សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យជាជនជាតិចិនមួយក្រុម ប្រដាប់ដោយកាំភ្លើងខ្លីបានចូលប្លន់ហាងជនជាតិចិនមួយកន្លែង ដែលមានយីហោ គុជ ហីហី ផ្ទះលេខ២២ នៅខាងក្រោយផ្សារឯករាជ្យមួយ ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ កាលពីវេលាម៉ោង១០និង៥០នាទីព្រឹក ថ្ងៃទី០៧ ខែវិច្ឆិកា ឆ្នាំ២០១៩ តែត្រូវបានកម្លាំងនគរបាលឃាត់ខ្លួនភ្លាមៗចំនួន២នាក់ ដកហូតកាំភ្លើងមួយដើម ។
សមត្ថកិច្ចបញ្ជាក់ថា ជនសង្ស័យឃាត់ខ្លួនឈ្មោះសែវ ទុង ភេទប្រុស អាយុ៣១ឆ្នាំ ជាជនជាតិចិន មុខរបរលក់ដូរ ស្នាក់នៅមិនចាំកន្លែង ។ ចំណែកបក្ខពួកដែលគេចខ្លួនចំនួន៣នាក់ ទី១ឈ្មោះ សែវ ហ៊ួ ភេទប្រុស ជាជនជាតិចិន (គេចខ្លួន) ទី២ឈ្មោះ សែវ ហ៊ឺ ភេទប្រុស អាយុប្រហែល២៣ឆ្នាំ (គេចខ្លួន) និងទី៣ឈ្មោះ សែវ ចេវ ភេទប្រុស អាយុប្រហែល២៣ឆ្នាំ ជាជនជាតិចិន (គេចខ្លួន) ។ ជនរងគ្រោះឈ្មោះ Xue Dan Feng ភេទស្រី អាយុ៣១ឆ្នាំ មុខរបរធ្វើការរោងចក្រ XIN YUAN មានប្តីឈ្មោះXU Jang Wei អាយុ២៨ឆ្នាំ មុខរបរលក់គ្រឿងគុជ និងវេរលុយទៅប្រទេសក្រៅ អ្នកទាំងពីរស្នាក់នៅកន្លែងកើតហេតុ ។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យ បានឲ្យដឹងថា មុនពេលកើតហេតុ ជនរងគ្រោះពីរនាក់ប្តីប្រពន្ធអង្គុយក្នុងហាងរបស់ខ្លួន បន្ទាប់មកស្រាប់តែមាន ជនសង្ស័យមានគ្នា៤នាក់ ប្រដាប់ដោយកាំភ្លើងខ្លី២ដើមបានបិទមុខចូលក្នុងហាងយីហោខាងលើ ភ្ជង់ប្លន់យកលុយពីជនរងគ្រោះ ។ ភ្លាមនោះជនរងគ្រោះក៏បានរត់ចេញមកក្រៅផ្ទះរួចទាញទ្វារបិទចាក់សោខាងក្រៅភ្លាមនោះជនសង្ស័យបានបាញ់ចំនួន២គ្រាប់ ដើម្បីផ្តាច់សោទើបបង្កការភ្ញាក់ផ្អើលដល់ប្រជាពលរដ្ឋបានរាយការណ៍ទៅសមត្ថកិច្ចភ្លាមៗ ។
ក្រោយពីទទួលបានព័ត៌មាន លោក យឹម សារ៉ាន់ អធិការនគរបាលខណ្ឌពោធិ៍សែនជ័យបញ្ជាកម្លាំងចុះលោមព័ទ្ធ និងចាប់ឃាត់ខ្លួនជនសង្ស័យបានចំនួន០២នាក់ និងដកហូតកាំភ្លើងខ្លីមួយដើមម៉ាក K59 នាំយកទៅសាកសួរនៅប៉ុស្តិ៍រដ្ឋបាលនគរបាលចោមចៅទី១ ។ ចំណែកបក្ខពួកផ្សេងទៀតបានគេចខ្លួនបាត់អស់ ។
លោក យឹម សារ៉ាន អធិការនគរបាលខណ្ឌបានបន្ត ក្រោយពីសាកសួរក្នុងចំណោមជនសង្ស័យ២នាក់នោះ ម្នាក់មិនជាប់ពាក់ព័ន្ធ នឹងករណីខាងលើទេ ហើយបានដោះលែងទៅវិញ ដោយឡែក ម្នាក់ទៀតត្រូវបានកសាងសំណុំរឿងបញ្ជូនទៅអធិការនគរបាលខណ្ឌដើម្បីចាត់ការតាមច្បាប់ ។
លោកអធិការបានបន្តថា ក្នុងហេតុការណ៍ខាងលើនេះ ជនសង្ស័យបានប្លន់យកលុយចំនួន៣០០ដុល្លារអាមេរិកគេចខ្លួនបាត់ ៕ សុខាសែនជ័យ
