សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ បុរសជនជាតិព្នងម្នាក់បានយកផាវគ្រាប់បែកមកច្នៃសម្រាប់បោកត្រី ដោយប្រើដងកាំបិតស្នៀត ចុងស្រួចទៅបុក តែភ្លាត់ស្នៀតក៏ផ្ទុះចុងកាំបិតហោះឡើងជង’ភ្នែកស្លាប់ភ្លាមៗនៅនឹងកន្លែងតែម្តង ។
ហេតុការណ៍នេះបានកើតឡើងកាលពីរសៀលថ្ងៃទី១៩ ខែវិច្ឆិកា ឆ្នាំ២០១៩ ត្រង់ចំណុចភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី ។
ប្រភពព័ត៌មានបានឲ្យដឹងថា ជនរងគ្រោះនោះឈ្មោះ ព្យើល ព្លើន ជនជាតិព្នងរស់នៅភូមិ ឃុំ កើតហេតុខាងលើ ។
ប្រភពបន្តបានឲ្យដឹងថា ជនរងគ្រោះរងរបួសដាច់ប្រអប់ត្រឹមដៃ ខាងឆ្វេង ហើយកាំបិត ដែលយកទៅដំបុកគ្រាប់ផាវនោះ បានហោះឡើងលើទៅជង់ជាប់នឹងភ្នែកបណ្តាលឲ្យស្លាប់ភ្លាមៗនៅនិងកន្លែងកើតហេតុតែម្តង ។
ប្រភពីកន្លែងកើតហេតុថា មុនកើតហេតុជនរងគ្រោះបានយកផាវគ្រាប់បែកចំនួន៣០គ្រាប់មកដំបំបែកហើយយករំសេវបុកច្រកដាក់បញ្ចូលក្នុងសបកកំប៉ុងដាក់គីបសម្រាប់បោកយកត្រីនៅតាមអូរ ។
ប៉ុន្តែជាអកុសល្យខណៈពេលដែលជនរងគ្រោះកំពុងតែយកដងកាំបិតស្នៀតបុករំសេវចូលក្នុងកំប៉ុងឲ្យណែនស្រាប់តែផ្ទុះហើយកាំបិតចុងស្រួចហោះឡើងលើតម្រង់ចំគ្រាប់ ភ្នែកជង់ជាប់យ៉ាងជ្រៅបណ្តាលឲ្យស្លាប់ តែម្តង ។
ក្រោយកើតហេតុកម្លាំងនគរបាលស្រុកអូររាំងដែលដឹកនាំដោយលោកវរសេនីយ៍ឯកប៊ូ ប៊ុនឈាត អធិការនគរបាលស្រុក ក៏បានចុះទៅដល់ហើយ ធ្វើកោសល្យវិច័យ និងស្រាវជ្រាវ លម្អិតបន្ថែមទៀត ។
សាកសពជនរងគ្រោះ ត្រូវបានសមត្ថកិច្ចបានប្រគល់ឲ្យសាច់ញាតិធ្វើបុណតាមប្រពៃណីជនជាតិព្នង ៕ ជីវ័ន្ត
