ព័ត៌មានទាន់ហេតុការណ៍៖

បើកម៉ូតូមិនប្រកាន់ស្ដាំបុកម៉ូតូមួយគ្រឿងទៀត ច្រាស់ទិសគ្នាបណ្ដាលឲ្យរងរបួសធ្ងន់២នាក់

ចែករំលែក៖

ខេត្តកណ្ដាល៖ ម៉ូតូមួយគ្រឿង បើកបោះពួយយ៉ាងលឿន បានរេចង្កូតទៅឆ្វេងចូលគន្លងផ្លូវម្ខាងទៀត ជ្រុលទៅបុកម៉ូតូមួយគ្រឿងទៀតបើកច្រាស់ទិសគ្នាពេញមួយទំហឹង បណ្ដាលឲ្យជនរងគ្រោះ២នាក់ជាអ្នកបើកបរម៉ូតូទាំងសង្ខាងរងរបួសធ្ងន់ ។ហេតុការណ៍គ្រោះថ្នាក់ចរាចរណ៍នេះ បានកើតឡើង នៅវេលាម៉ោង២១និង៣០នាទី ថ្ងៃទី២១ ខែវិច្ឆិកា ឆ្នាំ២០១៩ លើកំណាត់ផ្លូវជាតិលេខ១១០ ត្រង់ចំណុចមុខវត្តជ្រុងរមាស ស្ថិតនៅក្នុងភូមិកំពង់កុង ឃុំកំពង់កុង ស្រុកកោះធំ ខេត្តកណ្តាល ។

មន្រ្ដីនគរបាលចរាចរណ៍ស្រុកកោះធំបានឲ្យដឹងថា ម៉ូតូបង្កម៉ាកហុងដាឌ្រីម ស៊េរីឆ្នាំ២០១០ ធុនសេ១២៥ ពណ៌ខ្មៅ ពាក់ស្លាកលេខ កណ្ដាល 1M- 2181 បើកបរដោយឈ្មោះ ឡេង ផេង ភេទប្រុស អាយុ៤៨ឆ្នាំ មុខរបរកសិករ មានទីលំនៅភូមិព្រែកផ្អាវ ឃុំកំពង់កុង ស្រុកកោះធំ (រងរបួសធ្ងន់) ។ ចំណែកភាគីម៉ូតូមួយគ្រឿងទៀតម៉ាកហុងដាគុប ធុនសេ៩០ ពណ៌ បៃតងចាស់ អត់ស្លាកលេខ បើកបរដោយឈ្មោះ ផន ធុច ភេទប្រុស អាយុ៤៣ឆ្នាំ មុខរបរ កសិករ មានទីលំនៅភូមិទួលស្វាយ ឃុំកំពង់កុង ស្រុកកោះធំ (រងរបួសធ្ងន់) ។

ប្រភពដដែលបន្ដថា នៅមុនពេលកើតហេតុ សាក្សីបានឃើញម៉ូតូម៉ាកហុងដាឌ្រីម មួយគ្រឿង ធ្វើដំណើរតាមបណ្ដោយផ្លូវលេខ១១០ ក្នុងទិសដៅពីជើងទៅត្បូង ដោយល្បឿនលឿន លុះមកដល់ចំនុចកើតហេតុ បានរេចង្កូតទៅឆ្វេង(មិនប្រកាន់ស្ដាំ)ចូលទៅកន្លងផ្លូវម្ខាងទៀត បណ្ដាលឲ្យបុកជាមួយម៉ូតូមួយគ្រឿងទៀតម៉ាកហុងដាគុបបើកច្រាស់ទិសគ្នាពេញមួយទំហឹង ធ្វើឲ្យជនរងគ្រោះទាំង២នាក់ជាអ្នកបើកបរម៉ូតូទាំងសង្ខាងរងរបួសធ្ងន់ ។

ក្រោយពីមានហេតុការណ៍កើតឡើង ជនរងគ្រោះទាំង២នាក់ ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យប្រតិបត្ដិស្រុកកោះធំ ដោយឡែកម៉ូតូទាំង២គ្រឿង ត្រូវបានសមត្ថកិច្ចនគរបាលជំនាញ ចុះធ្វើការវាស់វែង រួចកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមច្បាប់ ។

តាមការសន្និដ្ឋានរបស់សមត្ថកិច្ចបានឲ្យដឹងថា ករណីនេះបង្កឡើងដោយអ្នកបើកបរម៉ូតូហុងដាឌ្រីម ធុនសេ១២៥ បើកបរមិនប្រកាន់ស្តាំ ទើបបានទៅបុកម៉ូតូហុងដាគុប ធុនសេ៩០ រងរបួសបែបនេះ ៕ ស្អាងជ័យ


ចែករំលែក៖