សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារីជនជាតិខ្មែរជាមេការខារ៉ាងអូខេមួយកន្លែង បានទាស់សម្តីគ្នាជាមួយនារីជាអ្នកមេការចិន រឿងបុគ្គលិកប្រុសជាជនជាតិវៀតណាម តែងខ្លួនជាមនុស្សស្រីទៅអង្គុយជាមួយភ្ញៀវនៅក្នុង KTV ជាមួយគ្នារហូតប្រើហិង្សាទៅវិញ ទៅមកស្រាប់តែបុរសជាសង្សារ និងប្អូនប្រុសនារីមេការមកជួយបែរជាបុរសជនជាតិចិនមួយក្រុម ជាបុគ្គលិកវាយបណ្តាលឲ្យរងរបួស និងបង្កការភ្ញាក់ផ្អើលកាលពីវេលាម៉ោង១រំលងអធ្រាត្រ ឈានចូលថ្ងៃទី២៨ ខែវិច្ឆិកា ឆ្នាំ២០១៩ នៅមជ្ឈមណ្ណលកំសាន្ត យីហោ ជិន ជន ដែលមានទីតាំងនៅតាមបណ្តោយមហាវិថីសហព័ន្ធរុស្សី ស្ថិតក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាមសម្ដីនារីរងគ្រោះ បានរៀបរាប់ប្រាប់អ្នកសារព័ត៌មានថា មុនកើតហេតុ គាត់បានចូលធ្វើការដូចសព្វដង ខណ:កើតហេតុ ក៏មានទំនាស់ពាក្យសម្ដីជាមួយមេការចិន រឿងបុគ្គលិកប្រុស តែតែងខ្លួនជាស្រីមកធ្វើការបម្រើភ្ញៀវ ។ បន្ទាប់មក ក៏មានការឈ្លោះប្រកែកគ្នា រហូតមានភាគីខាងជនជាតិចិន៣ ទៅ៤នាក់ បានអូសនារីរងគ្រោះចេញមកក្រៅ ហើយទះ២ទៅ៣កំផ្លៀង ទើបធ្វើឲ្យបុរសម្នាក់ ជាសង្សារខាងនារីរងគ្រោះស្ទុះទៅជួយ និងវាយតបគ្នាមួយសន្ទុះ រហូតមានបងប្អូនប្រជាពលរដ្ឋ ជួយអន្តរាគមន៍ចាប់បំបែកពីគ្នា ។
ដោយមិនអស់ចិត្ត ព្រោះនារីរងគ្រោះ ត្រូវបានភាគីខាងជនជាតិចិនព្រួតវាយធ្វើបាប ទើបរូបនាង និងសង្សារបាននាំគ្នា ជិះម៉ូតូទៅដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាលចោមចៅ៣ ដើម្បីឲ្យសមត្ថកិច្ចជួយរកយុត្តិធម៌ ។
សូមបញ្ជាក់ផងដែរថា ទីតាំងខាងលើកន្លងមកធ្លាប់មានបុរសជនជាតិចិនវាយធ្វើបាបនារីបំរើការងារក្នុងខារ៉ាអូខេខាងលើជានជាតិខ្មែរ និងបង្ខំឲ្យដេកជាមួយភ្ញៀវទៀតផង ៕ សុខាសែនជ័យ
