សារព័ត៌មាន នគរវត្ត តែងតែនាំមុខគេជានិច្ច
នៅលើបឹងទន្លេសាបក្នុងតំបន់ផាត់សណ្តាយ ស្រុកកំពង់ស្វាយ ខេត្តកំពង់ធំពេលរាត្រី គេឃើញអំពូលភ្លើងអណ្តែតលើទឹកស្អេកស្កះខៀវស្រងាត់ ដូចជាមានការសម្តែងវង់ល្ខោនដែលមានអ្នកលក់ដូរគគ្រឹកគគ្រេង ។ បទល្មើសនេសាទទាំងនោះ ត្រូវបានអនុញ្ញាតឲ្យធ្វើជាចំហរ ដោយគ្មានការបង្ក្រាបនោះឡើយ ។ អាជ្ញាធរខេត្តកំពង់ធំចាត់តាំងសមត្ថកិច្ចដឹកនាំដោយថ្នាក់អភិបាលរងស្រុកចុះបង្ក្រាបបទល្មើសនេសាទក្នុងតំបន់បឹងទន្លេសាបក្នុងស្រុកកំពង់ស្វាយនោះដែរ ប៉ុន្តែវាគ្រាន់តែជារបៀបវាយស្មៅបង្អើលពស់ តែប៉ុណ្ណោះ ។ អាជ្ញាធរបង្កើតក្រុមការងារឲ្យចុះបង្ក្រាបនៅពេលដែលដឹងថា ពួកជលផលកំពុងកាក់កបយ៉ាងសម្បើមជុំវិញបញ្ហាបទល្មើសនេសាទ ហើយអាជ្ញាធរមិនបានផលប្រយោជន៍ដូច្នេះ ក៏បង្កើតក្រុមការងារឲ្យចុះបង្ក្រាបដែរ ក្រែងបានលាភសក្ការ ។
សេចក្តីរាយការណ៍បានឲ្យដឹងថា បទល្មើសនេសាទនៅក្នុងដែនសមត្ថកិច្ចរបស់លោកយ៉ាន់ វិសាក់ ហៅសែ បានកើតមានជាចំហរហើយអាជ្ញាធរខេត្តបានចាត់តាំងលោក ឡាង សារ៉ូ អភិបាលរងស្រុកកំពង់ស្វាយដើម្បីចុះបង្ក្រាបបទល្មើស ព្រោះដឹងថា ក្រុមលោកយ៉ាន់ វិសាក់ ត្រូវប៉ាន់សម្បើមពីបញ្ហាបទល្មើសនេសាទនៅតំបន់ផាត់សណ្តាយ ។ គោលការណ៍គឺចង់ឲ្យអាជ្ញាធរស្រុកចុះទៅស្វែងរកលាភសក្ការពីបញ្ហាបទល្មើសនៅតំបន់នោះខ្លះ ពីព្រោះនៅខេត្តកំពង់ធំនរណាក៏ល្បីរឿងលោកយ៉ាន់ វិសាក់ ហៅសែ ត្រូវប៉ាន់យ៉ាងសន្ធឹកអំពីបញ្ហាបទល្មើសនេសាទនោះដែរ ។ ប៉ុន្តែលោកយ៉ាន់ វិសាក់ មិនសែនព្រេនលោកអភិបាលរងខេត្តនោះឡើយ ។ ដូច្នេះការបង្កើតក្រុមការងារឲ្យចុះបង្ក្រាបបទល្មើសនេសាទ ក្រៅតែពីដើម្បីរកលាភសក្ការ គោលដៅមួយទៀតគឺចង់វាយកម្ទេចឆ្នាំងបាយរបស់លោកយ៉ាន់ វិសាក់ ហៅសែ នេះឯង ។
បើតាមសេចក្តីរាយការណ៍បានឲ្យដឹងថា នាគ្រាកន្លងមកពួកឈ្មួញធំៗបានបង់ប្រាក់ផ្តាច់ទៅឲ្យលោកយ៉ាន់ វិសាក់ ហៅសែ ដើម្បីអាចប្រព្រឹត្តបទល្មើសនេសាទបានដោយមិនញញើត ។ ដោយមានការរិះគន់ចំពោះអាជ្ញាធរខេត្តកំពង់ធំនោះផង ទើបថ្នាក់ដឹកនាំខេត្តដែលមិនទទួលបានលាភសក្ការចាត់តាំងក្រុមការងារផ្សេងឲ្យចុះបង្ក្រាបបទល្មើស។ បើទោះជាយ៉ាងនេះក៏ដោយ លោកយ៉ាន់ វិសាក់ មិនខ្វល់នោះទេ ពីព្រោះលោកមានប្រធានមន្ទីរកសិកម្មរុក្ខាប្រមាញ់ និងនេសាទលោក ប៉ែន វណ្ណរិទ្ធ ជាអ្នកការពារ ពីព្រោះថា ផលប្រយោជន៍ដែលទទួលបានពីបទល្មើសនេសាទ ក្នុងតំបន់ផាត់សណ្តាយ នៃស្រុកកំពង់ស្វាយ ខេត្តកំពង់ធំនោះ ត្រូវបានចែករំលែក ជូនលោកប៉ែន វណ្ណរិទ្ធ ហើយលោកប៉ែន វណ្ណរិទ្ធ ចែករំលែកបន្តលោកសុខ លូ អភិបាលខេត្តកំពង់ធំយ៉ាងណានោះ វាជារឿងរបស់លោកប្រធានមន្ទីរ ៕
