សារព័ត៌មាន នគរវត្ត តែងតែនាំមុខគេជានិច្ច
បទល្មើសនេសាទនៅស្រុកបាកាន ខេត្តពោធិ៍សាត់ ត្រូវបានអនុញ្ញាតឲ្យធ្វើជាចំហរដោយមិនមានការបង្ក្រាបពីសមត្ថកិច្ចជំនាញនោះឡើយ ។ នៅក្នុងស្រុកបាកាន ខេត្តពោធិ៍សាត់ បទល្មើសនេសាទបានកើតឡើងយ៉ាងសកម្ម គ្មានមន្ត្រីជលផលណាចុះបង្ក្រាបឡើយ ផ្ទុយទៅវិញ ពួកមន្ត្រីជលផលជាអ្នកឃុបឃិតឲ្យមានបទល្មើសនោះថែមទៀត។ ពួកជលផលអះអាងថា ឆ្នាំនេះ ស្ថានភាពទឹកទន្លេឆាប់ឡើង ឆាប់ស្រក ធ្វើឲ្យទិន្នផលត្រីថយចុះ និយាយឲ្យខ្លី ឆ្នាំនេះគ្មានត្រីដូចឆ្នាំមុនៗនោះឡើយ ។ ដូច្នេះបទល្មើសនេសាទមានតិចតួចតែប៉ុណ្ណោះ ។ ប្រសិនបើមានបទល្មើសតិចតួចហើយបង្ក្រាបទៀតនោះ គឺហាក់ដូចជាច្របាច់កអ្នកនេសាទពេកហើយ ។
ប៉ុន្តែផ្ទុយទៅវិញ ក្រុមអ្នកនេសាទនៅតំបន់បឹងទន្លេសាបក្នុងស្រុកបាកានពាសវាលពាសកាលនោះ សុទ្ធតែត្រូវបង់លុយឲ្យមន្ត្រីជលផល ដែលក្នុងនោះ មេជលផលប្រចាំស្រុកបាកាន គឺលោកលឹម សុក្រឹត នាយសង្កាត់រដ្ឋបាលជលផលបាកាន ។ បច្ចុប្បន្ននេះ ដោយស្ថានភាពទឹកទន្លេសាបស្រកចុះយ៉ាងខ្លាំង ដូច្នេះអ្នកប្រើប្រាស់ឧបករណ៍នេសាទល្មើសច្បាប់ត្រូវរំកិលបទល្មើសរបស់ខ្លួនទៅតាមស្ថានភាពទឹក ។ ប៉ុន្តែមុនរំកិលបទល្មើសដូចជា បរ ត្រូវបង់លុយឲ្យលោក លឹម សុក្រឹត ក្នុងមួយទីតាំង១០០ដុល្លារ ។ ប្រសិនបើមិនសុំច្បាប់ដើម្បីរំកិលទីតាំងទៅតាមស្ថានភាពទឹកទេនោះ គឺមិនអាចដាក់បទល្មើសបាននោះឡើយ ។ អ្នកនេសាទអះអាងថា វាជារឿងធម្មតាដែលត្រូវបង់លុយឲ្យក្រុមជលផល បើមិនដូច្នោះទេ មិនអាចប្រព្រឹត្តល្មើសបានឡើយ ។
លោកលឹម សុក្រឹត គឺជាមន្ត្រីជលផលវ័យក្មេងដែលប្រព្រឹត្តអំពើពុករលួយជាចំហរនៅតំបន់បឹងទន្លេសាប ក្នុងស្រុកបាកាន ។ លោកបានដើរនិយាយប្រាប់ពួកអ្នកនេសាទល្មើសច្បាប់នៅតំបន់នោះថា លោកបានចំណាយប្រាក់អស់ច្រើនណាស់ដើម្បីបានកាន់តំណែងនៅបាកាននេះ ដូច្នេះត្រូវតែស្រង់ដើមខ្លះទើបបាន ។ បើតាមប្រភពអះអាងថា បទល្មើសនេសាទទ្រង់ទ្រាយធំត្រូវបង់ប្រាក់រហូតដល់កន្លះម៉ឺនដុល្លារ ដែលជាការបង់ប្រចាំឆ្នាំ និងអ្នកនេសាទធុនមធ្យមត្រូវបង់យ៉ាងហោចណាស់១ពាន់ដុល្លារ ប៉ុន្តែនៅពេលផ្លាស់ប្តូរទីតាំងប្រព្រឹត្តល្មើសត្រូវបង់លុយម្តងទៀត ។ ពួកអ្នកនេសាទនិយាយថា ម៉ាត់ណាក៏ត្រូវបង់លុយជូនលោកលឹម សុក្រឹតនោះដែរ ទើបអាចរកស៊ីបាន បើមិនដូច្នោះទេ មុខជាត្រូវប្រឈមនឹងការចាប់ថតផ្សាយតាមទូរទស្សន៍ខ្មាស់គេជាមិនខានឡើយ ៕
