សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន ៖ កាលពីវេលាម៉ោង១០និង១៥នាទីព្រឹក ថ្ងៃទី២៩ ខែវិច្ឆិកា ឆ្នាំ២០១៩ សមត្ថកិច្ចនគរបាលក្រុងប៉ៃលិន បានចុះអន្តរាគមន៍លើព្រះសង្ឃមួយអង្គ ដែលបានបង្កការអុកឡុកក្នុងវត្តពោធិមារាម ហៅវត្តប៉ាហ៊ី តាមការស្នើសុំរបស់គណៈកម្មាធិការវត្ត និងមន្ទីរធម្មការ និងពុទ្ធសាសនាខេត្ត។ លុះចូលទៅពិនិត្យ ក៏ស្រាប់តែរកឃើញថា ព្រះសង្ឃនេះ បានលួចទូរស័ព្ទព្រះសង្ឃមួយអង្គផ្សេងទៀត ទើបត្រូវព្រះចៅអធិការវត្តសម្រេចចាប់ផ្សឹក ហើយប្រគល់ឲ្យសមត្ថកិច្ចជំនាញធ្វើការតាមនីតិវិធី។
បើតាម លោកវរសេនីយ៍ទោ យ៉ែម សារិទ្ធ អធិការនគរបាលក្រុងប៉ៃលិនបានឲ្យដឹងថា ដំបូងឡើយព្រះសង្ឃ និងគណៈកម្មាធិការវត្ត ព្រមទាំងប្រធានមន្ទីរធម្មការសាសនាខេត្ត បានស្នើសុំឲ្យមានការអន្តរាគមន៍ លើព្រះសង្ឃមួយអង្គ ដែលបានបង្កការអុកឡុកក្នុងវត្ត ដោយសង្ស័យប្រើប្រាស់គ្រឿងញៀន លុះនៅពេលសមត្ថកិច្ចជំនាញចុះទៅសាកសួរ ក៏មានព្រះសង្ឃមួយផ្សេងទៀតរាយការណ៍ថា បាត់ទូរស័ព្ទ ពេលនោះ កម្លាំងសមត្ថកិច្ច ក៏ធ្វើការស្រាវជ្រាវ ស្រាប់តែទូរស័ព្ទដែលបាត់នៅលើខ្លួនជនសង្ស័យតែម្តង។
លោកអធិការបានបន្តថា សមត្ថកិច្ចយើង បានសុំគោលការណ៍ថ្នាក់លើធ្វើការផ្សឹកព្រះសង្ឃជាជនសង្ស័យនោះ ដើម្បីដំណើរការតាមនីតិវិធីច្បាប់។
ជនសង្ស័យជាសង្ឃ ឈ្មោះ ឈើយ ពិសិដ្ឋ អាយុ២៥ឆ្នាំ មានស្រុកកំណើតនៅខេត្តបាត់ដំបង និងមានទីលំនៅភូមិផ្សាព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មកស្នាក់នៅរៀនធម៌នៅវត្តពោធិមារាម ហៅវត្តប៉ាហ៊ី ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន។
លោកអធិការបានបន្តថា ចំណែកព្រះសង្ឃរងគ្រោះ ព្រះនាម សុវណ្ណ បញ្ញា មានជន្មាយុ១៥ព្រះវស្សា គង់នៅទីកន្លែងកើតហេតុខាងលើ ដោយបាត់ទូរស័ព្ទដៃមួយគ្រឿងម៉ាកអាយហ្វូន(iPhone ) ផងដែរ។ ក្រោយការឃាត់ខ្លួនជនសង្ស័យខាងលើ សមត្ថកិច្ចជំនាញក្រុងប៉ៃលិន ក៏សួរនាំ និងធ្វើតេស្តរកសារធាតុញៀនជាលទ្ធផល មានផ្ទុកសារធាតុញៀនក្នុងខ្លួន។
បច្ចុប្បន្ន ជនសង្ស័យ ត្រូវបានកម្លាំងជំនាញផ្នែកព្រហ្មទណ្ឌ និងផ្នែកប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិន នាំខ្លួនមកកាន់អធិការដ្ឋានដើម្បីសួរនាំបន្ថែម និងកសាងសំណុំរឿងបញ្ជូនទៅកាន់អយ្យការអមសាលាដំបូងខេត្តប៉ៃលិនចាត់ការតាមនីតិវិធីច្បាប់ ចំណែកទូរស័ព្ទ ត្រូវបានប្រគល់ជូនទៅឲ្យម្ចាស់ដើមវិញផងដែរ៕ សសារ៉េត
