សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ កម្លាំងនគរបាលស្រុកពួក បានឃាត់ខ្លួនជនសង្ស័យម្នាក់ ពាក់ព័ន្ធករណីហិង្សាដោយចេតនា មានស្ថានទម្ងន់ទោស ចាក់ដោយកូនកាំបិតចុងស្រួច ខណៈមានទំនាស់ពាក្យសម្ដីក្នុងវង់ផឹកស៊ី។
លោកវរសេនីយ៍ឯក ទេព ពុំសែន អធិការ នៃអធិការដ្ឋាននគរបាលស្រុកពួកបានឲ្យដឹងនៅព្រឹកថ្ងៃទី០៩ ខែធ្នូ ឆ្នាំ២០១៩ថា មានករណីហិង្សាដោយចេតនាមានស្ថានទម្ងន់ទោស បង្កឡើងកាលពីវេលាម៉ោង២២និង៣០នាទី ថ្ងៃទី០៧ ខែធ្នូ ឆ្នាំ២០១៩ ត្រង់ចំណុចភូមិគោកត្រាច ឃុំរើល ស្រុកពួក ខេត្តសៀមរាប ដោយជនសង្ស័យ ឈ្មោះ សារឿន រ៉ា បានផឹកស៊ីស្រវឹងទំនាស់ពាក្យសំដីជាមួយជនរងគ្រោះ ឈ្មោះ រើន រ៉ាត់ ភេទប្រុស អាយុ២២ឆ្នាំ មុខរបរកសិករ នៅភូមិ-ឃុំកើតហេតុជុំគ្នា រហូតឈានដល់ការប្រើអំពើហិង្សា ដោយជនរងគ្រោះ ឈ្មោះ រើន រ៉ាត់ បានយកដំបងវាយលើជនសង្ស័យ ឈ្មោះ សារឿន រ៉ា ត្រូវ១ដំបងមុន ហើយលោតទៅចាប់ឱបត្រូវ ឈ្មោះ សារឿន រ៉ា ចាក់ដោយអាវុធកូនកាំបិតកោរ ចុងស្រួច បណ្ដាលឲ្យ ឈ្មោះរើន រ៉ាត់ រងរបួស០៣កន្លែង គឺ របួសមុតសាច់ដោះខាងស្ដាំ០១កន្លែង មុតសាច់ដើមទ្រូង០១កន្លែង និងរយះស្បែកលើចិញ្ចើម០១កន្លែង(ស្រាល) ។
ក្រោយកើតហេតុ សមត្ថកិច្ច បានបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកខេត្តសៀមរាប ។ ចំណែកជនសង្ស័យ ឈ្មោះ សារឿន រ៉ា ត្រូវបានសមត្ថកិច្ចឃាត់ខ្លួន និងនាំមកសាកសួរនៅអធិការដ្ឋាននគរបាលស្រុកពួក ។
តាមការសាកសួររបស់សមត្ថកិច្ច ជនសង្ស័យ បានសារភាពថា ខ្លួនពិតជាបានប្រព្រឹត្តបទល្មើសដោយចេតនា យកកូនកាំបិតចុងស្រួចចាក់លើឈ្មោះ រើន រ៉ាត់ ឲ្យរបួសពិតមែន។
នៅថ្ងៃទី០៩ ខែធ្នូ ឆ្នាំ២០១៩ នេះ សមត្ថកិច្ច កំពុងរៀបចំកសាងសំណុំរឿងបញ្ជូនទៅសាលាដំបូងខេត្តសៀមរាប ដើម្បីអនុវត្តតាមនីតិវិធីបន្ត ៕ ប៊ុនរិទ្ធី
