ប៉ូលិសស្រុកកោះធំបង្រ្កាបក្រុមជនជាតិចិន៣នាក់ចាប់បង្ខាំងជម្រិតជនជាតិចិនដូចគ្នា ជាថ្នូនឹងទឹកប្រាក់ចំនួន៥ម៉ឺនយ័ន

ខេត្តកណ្ដាល៖ ប៉ូលិសស្រុកកោះធំ សហការជាមួយកម្លាំងប៉ូលិសវរព្រំដែនគោកលេខ៦០៥ បានបើកប្រតិបត្ដិការបង្រ្កាបក្រុមជនសង្ស័យជនជាតិចិន៣នាក់ ក្រោយពីជនជាតិចិនសង្ស័យខាងលើនេះ បានធ្វើសកម្មភាពយកកាំបិតផ្ទង់ទៅលើជនជាតិចិដូចគ្នា រុញបញ្ចូលក្នុងរថយន្ដ បង្ខាំងទុកដើម្បីជម្រិតទារប្រាក់ពីក្រុមគ្រួសារជនជាតិចិនរងគ្រោះ ចំនួន៥ម៉ឺនយ័នជាថ្នូរនៃការដោះលែង ។ ប្រតិបត្ដិការបង្រ្កាបខាងលើនេះ ធ្វើឡើងថ្ងៃទី១១ ខែធ្នូ ឆ្នាំ២០១៩ វេលាម៉ោង២១និង៣០នាទី ស្ថិតក្នុងភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល ។

ប៉ូលិសស្រុកកោះធំបានឲ្យដឹងថា ក្រុមជនសង្ស័យជនជាតិចិនដែលសមត្ថកិច្ចធ្វើការបង្រ្កាបឃាត់ខ្លួនមានគ្នា៣នាក់ ទី១/ឈ្មោះ ស៊ាវ ជីវ័យ ភេទប្រុស អាយុ២៦ឆ្នាំ ជនជាតិចិន មុខរបរ បុគ្គលិកទីផ្សារ ទី២/-ឈ្មោះ ចាង វ័យជី ភេទប្រុស អាយុ១៩ឆ្នាំ ជនជាតិចិន មុខរបរ បុគ្គលិកទីផ្សារ និងទី៣/-ឈ្មោះ ចឹង វួយភីង ភេទប្រុស អាយុ២៤ឆ្នាំ ជនជាតិចិន មុខរបរ បុគ្គលិកទីផ្សារ ។ ក្រុមជនសង្ស័យទាំង៣នាក់នេះ បច្ចុប្បន្នស្នាក់នៅភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល ។ ចំណែកជនរងគ្រោះឈ្មោះ តឹង ធៀនសឹង ភេទប្រុស អាយុ ១៨ឆ្នាំ ជនជាតិចិន មុខរបរ បុគ្គលិកផ្នែកពត៌មានវិទ្យា បច្ចុប្បន្នស្នាក់នៅភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្ដាល ។

ក្នុងប្រតិបត្ដិការបង្រ្កាបនេះផងដែរ ប៉ូលិសស្រុកកោះធំធ្វើការដកហូតវត្ថុតាងមាន៖ រថយន្ត១គ្រឿង ម៉ាកហាយឡេនឌ័រ ពណ៌ក្រហម ស្លាកលេខ ភ្នំពេញ 2Z-5149 ,កាំបិតប៉័ងតោ ចំនួន១ ,កូនកាំបិតចុងស្រួច ចំនួន១ ,កាំបិតមុខពីរចំនួន១ ,កាំបិតកៃពីរ+កន្ត្រៃចំនួន១ ,ម៉ាស់ ចំនួន៥ ,លិខិតឆ្លងដែន ចំនួន២ច្បាប់ ,ទូរស័ព្ទម៉ាក OPPO ចំនួន៣គ្រឿង ,កាបូបដៃចំនួន ១,កាតធនាគារATMចំនួន១០សន្លឹក ,ប័ណ្ណសម្គាល់ខ្លួនចំនួន២សន្លឹក ,លិខិតជួលរថយន្ដ ចំនួន ១ច្បាប់ និងពិលឆក់ចំនួន១គ្រឿងផងដែរ ។

ប្រភពដដែលបន្ដថា កាលពីថ្ងៃទី២៣ ខែវិច្ឆិកា ឆ្នាំ២០១៩ វេលាម៉ោង២២និង៣០នាទី ជនរងគ្រោះឈ្មោះ តឹង ធៀនសឹង ចេញពីធ្វើការវិញ រួចទៅរកបាយហូប ក្រោយពីហូបរួចជនរងគ្រោះត្រឡប់មកបន្ទប់ជួលរបស់ខ្លួនវិញ ខណៈកំពុងដើរ ក៏ស្រាប់តែក្រុមជនសង្ស័យជាជនជាតិចិន៣នាក់ បានបើករថយន្ដ ម៉ាកហាយឡេនឌ័រ ពណ៌ក្រហមស្លាកលេខ ភ្នំពេញ 2Z-5149 មកដល់ រួចយកកាំបិតផ្ជង់គំរាម ហើយចាប់ទាញជនរងគ្រោះចូលទៅក្នុងរថយន្ត រួចបានយកម៉ាស់មកបិទមុខ និងស្កុតមករុំចងដៃជើងជនរងគ្រោះ បន្ទាប់ពីក្រុមជនសង្ស័យធ្វើសកម្មភាពរួច ក៏ទំនាក់ទំនងម្ដាយរបស់ជនរងគ្រោះ ដោយជំរិតទារយកប្រាក់ចំនួន ២០០,០០០យ័ន(ប្រាក់ចិន) ជាថ្នូនៃការដោះលែង ។ បន្ទាប់ពីម្ដាយជនរងគ្រោះត្រូវបានក្រុមជនសង្ស័យទាប្រាក់ចំនួន២០០,០០០យ័ន ក៏ចចារគ្នានូវទឹកប្រាក់ចំនួន ៥០,០០០យ័ន ជាថ្នូរនៃការដោះលែង ។

ប្រភពដដែលបន្ដទៀតថា ក្រោយពីបានព្រមព្រៀងគ្នានូវទឹកប្រាក់៥០,០០០យ័នរួច ម្ដាយជនរងគ្រោះបានផ្ញើលុយទៅឲ្យជនសង្ស័យទាំង៣នាក់ខាងលើ បន្ទាប់មកក្រុមជនសង្ស័យបាននាំជនរងគ្រោះ ធ្វើដំណើរមកភ្នំពេញវិញ ក្នុងគោលបំណងទម្លាក់ជនរងគ្រោះពីលើរថយន្ដដើម្បីដោះលែងឲ្យមានសេរីភាពវិញ តែទោះជាយ៉ាងណាក៏ជនរងគ្រោះពុំហ៊ានចុះពីលើរថយន្ដដែរ ដោយខ្លាចក្រុមជនសង្ស័យសម្លាប់ចោល ដោយប្រើមធ្យោបាយធ្វើជាសុំនៅជាមួយដើម្បីរកពេលវេលាល្អ រត់គេច និងប្ដឹងប៉ូលិស ។ រហូតមកដល់ថ្ងៃទី១១ ខែធ្នូ ឆ្នាំ២០១៩ ជាថ្ងៃកើតហេតុ ក្រុមជនសង្ស័យ បាននាំជនរងគ្រោះជិះរថយន្តមកកាន់ភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល ដើម្បីរកគោលដៅចាប់ជំរិតទាប្រាក់បន្ដទៀត ខណៈនោះជនរងគ្រោះក៏រាយការណ៍ទៅប៉ួលិសស្រុកកោះធំដើម្បីជួយអន្ដរាគមន៍ចាប់ខ្លួន ។ បន្ទាប់កម្លាំងប៉ូលិសដឹងមុខសញ្ញាក្រុមជនសង្ស័យខាងលើមកដល់ជ្រៃធំ ស្រុកកោះធំ ភ្លាមនោះ ក៏ធ្វើការសហការជាមួយកកម្លាំងប៉ូលិសវរព្រំដែនគោកលេខ៦០៥ ធ្វើការបង្រ្កាបចូលទៅឃាត់ខ្លួនជនសង្ស័យទាំង៣នាក់ រួមនឹងវត្ថុតាងដូចបានរៀបរាប់ខាងលើ មកកាន់អធិការដ្ឋាននគរបាលស្រុកកោះធំ ដើម្បីចាត់ការតាមច្បាប់ ។

បច្ចុប្បន្នជនសង្ស័យទាំង៣នាក់ខាងលើ សមត្ថកិច្ចជំនាញកំពុងធ្វើសំណុំរឿងដើម្បីចាត់ការតាមច្បាប់ ៕ ស្អាងជ័យ