សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្តីប្រពន្ធមួយគូរស់នៅជាមួយគ្នាអស់រយះពេល២ឆ្នាំមកហើយ ដោយមិនបានរៀបការតាមច្បាប់ប្រពៃណីនោះទេ រហូតបង្កើតកូនប្រុសម្នាក់ទើបអាយុ១ខែតែប៉ុណ្ណោះ ស្រាប់តែទាស់សម្តីគ្នារហូតឈានទៅដល់ប្តីវាយធ្វើបាប និងចុះចោល ព្រោះតែរឿងមិត្តភក្តិ ។
ហេតុការណ៍នេះ បានលេចលឺដល់សមត្ថកិច្ចចុះទៅសួរនាំវេលាម៉ោង៧ និង៣០នាទីយប់ ថ្ងៃទី១១ ខែធ្នូ ឆ្នាំ២០១៩ នៅបន្ទប់ជួលភូមិត្រពាំងថ្លឹង៣ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ស្ដ្រីម្នាក់ទើបសម្រាលកូនបានជាង១ខែ ត្រូវបានប្ដីវាយ និងចុះទៅចោលដោយទុកឲ្យប្រពន្ធ និងកូនរស់នៅរកតែបាយហូបមិនបានផង ត្រូវបានលោកនាយរងប៉ុស្តិ៍ចោមចៅ២ ជួយឧបត្ថម្ភជាអង្ករ និងម្ហូបអាហារផងដែរដោយក្តីអាណិត ។ ស្ដ្រីដែលត្រូវប្តីរត់ចោលមានឈ្មោះ ចាន់ភក្ដី អាយុ២៨ឆ្នាំ និងកូនប្រុសទើបបានជាង១ខែ មានស្រុកកំណើត រស់នៅភូមិឫស្សីជួរ ឃុំក្រោលគោ ស្រុកស្វាយជ្រំ ខេត្តស្វាយរៀង ស្នាក់នៅបន្ទប់ជួលខាងលើ ។ ចំណែកប្ដីមានឈ្មោះ សារិទ្ធ អាយុ២៩ឆ្នាំ រស់នៅស្រុក ជាមួយគ្នាតែភូមិឃុំផ្សេងគ្នា ។
តាមប្រភពព័ត៌មានពីស្ត្រីខាងលើបាននិយាយរៀបរាប់ប្រាប់ថា រូបគាត់ និងប្ដីបានស្រឡាញ់ដោយចិត្តនឹងចិត្តហើយរស់នៅផ្ទះជួលជាមួយគ្នាអស់រយៈពេលជាង២ឆ្នាំបង្កើតបានកូនប្រុសម្នាក់ អាយុទើបតែជាង១ខែ ។ ប្ដីរបស់គាត់ជាកម្មករសំណង់ ចំណែករូបគាត់វិញ ពុំមានការងារធ្វើទេ ព្រោះគាត់ទើបនឹងសម្រាលកូន មុនថ្ងៃកើតហេតុមួយថ្ងៃប្តីរបស់គាត់បាននាំមិត្តភ័ក្តិមកផឹកស៊ីនៅបន្ទប់ផ្ទះជួលរបស់គាត់ ដោយបំរុងឲ្យមិត្តភ័ក្តិរស់នៅបន្ទប់ជួលជាមួយ ទាំងគាត់កំពុងតែមានជីវភាពខ្វះខាតផង បែរជាប្ដីឲ្យមិត្តភក្តិនៅជាមួយទៀត ពេលនោះគាត់បាននិយាយមិនចង់ឲ្យនៅជាមួយធ្វើឲ្យឈ្លោះប្រកែកសម្តីគ្នារហូតប្ដីវាយធ្វើបាប រួចក៏ចុះចោលគាត់ទៅបាត់តែម្ដង ។
ប្រភពដដែលបានរៀបរាប់បន្តទៀតថា កាលពីមុនគាត់ និងប្ដីតែងតែរស់នៅដោយមានជីវភាពខ្វះខាត ថ្ងៃខ្លះដេកទាំងអត់បាយ មួយថ្ងៃ២ថ្ងៃក៏មានដែរ ។
បន្ទាប់ពីការលេចលឺថា មានស្ត្រីទើបសម្រាលកូនហើយប្តីរត់ចោលលោកនាយរងប៉ុស្តិ៍ចោមចៅទី២ មានការអាណិតអាសូរពេក ក៏បានជួយជាអង្ករចំនួន៥គីឡូក្រាម និងម្ហូបអាហារ ព្រមទាំងមុងភួយ ដល់ ស្ត្រីដែលត្រូវប្តីរត់ចោល ។ សូម្បីតែម្ចាស់ផ្ទះជួលក៏មិនយកថ្លៃឈ្នួល និងទឹកភ្លើងផងដែរ ដោយឃើញជីវភាពខ្វះខាតខ្លាំងពេក ។
ជាចុងក្រោយស្ត្រីខាងលើសូមអំពាវនាវដល់សប្បុរសជនដែលមានសណ្តានចិត្តសូមជួយដល់ដល់រូបគាត់ផងគាត់មិនមានទីពឹងទេ ៕ សុខាសែនជ័យ
