សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីអតីតកីឡាករបាល់ទាត់ ឈ្មោះ ង៉ែត លីទី បានយកដំបងវាយទៅលើតារាចម្រៀង សុខ មេសា ហៅនាយចឺមនោះ នៅមិនទាន់ស្ងាត់នៅឡើយទេ ។ ក្រុមគ្រួសារនាយចឺមបានបង្ហាញពីក្តីព្រួយបារម្ភជាខ្លាំងទៅលើសុខភាពរូបរាងកាយ និងផ្លូវចិត្តរបស់នាយចឺមក្រោយរងការវាយដំសម្លុតបំភ័យនេះ។
នាយក្រូច ជាពូរបស់ នាយចឺម បានបញ្ជាក់ថារហូតមកដល់ពេលនេះ មានរយៈពេលបួនថ្ងៃហើយក្រោយពី នាយចឺម ជួបហេតុការណ៍អាក្រក់ហើយពេលនេះនាយចឺមបានចាកចេញពីខេត្តប៉ៃលិនហើយ ។ ឯស្ថានភាពរបួសមិនទាន់ធូរស្រាលនៅឡើយដែរ។ លោកបានបង្ហាញពីក្តីព្រួយបារម្ភខ្លាំងពីស្ថានភាពជំងឺ របស់ក្មួយប្រុសខណៈបងស្រីរបស់លោកនៅឯស្រុកកំណើតក៏កើតទុកខ្លោចចិត្តអាណិតកូនខ្លាំងដែរ។ លោកបន្តថាអ្វីដែលគួរឱ្យបារម្ភនោះគឺស្ថានភាពផ្លូវចិត្តរបស់ នាយចឺម មិនទាន់ល្អប្រសើរនោះទេ។ ជាពិសេស ផ្នែកក្បាលដែលត្រូវរបួសនោះគឺនៅឈឺនៅឡើយ ហើយកន្លែងដែលមិនត្រូវរបួសចាប់ផ្តើមឈឺ និង ហើមដែលធ្វើឱ្យក្រុមគ្រួសារមានការបារម្ភខ្លាចមានបញ្ហាឈាមកកទៅថ្ងៃក្រោយ ។ លោកថាពេលនេះ នាយចឺម ក៏បានទៅមន្ទីរពេទ្យដើម្បីពិនិត្យស្កេនជាថ្មីម្តងទៀត តែយ៉ាងណា នាយក្រូច មិនបានប្រាប់ពីលទ្ធផលនៅឡើយទេ ។
នៅមិនទាន់បានដឹងអំពីការចចារ ទាមទារសំណងណាមួយនៅឡើយខណៈ ជនបង្កត្រូវបានបញ្ជូនបញ្ជូនខ្លួនទៅកាន់សាលាដំបូងខេត្តប៉ៃលិនកាលពីថ្ងៃទី២០ ខែធ្នូនេះ ហើយបន្តឃុំខ្លួនបណ្តោះអាសន្នរងចាំការសាកសួរបន្ត។ ជាមួយគ្នានេះ នាយក្រូច ដែលត្រូវជាពូបានអះអាងថា ពិតជាមានអារម្មណ៍ខ្លោចចិត្តអាណិតក្មួយខ្លាំងណាស់ រហូតមកដល់ពេលនេះនាយមិនហ៊ានទាំងមើលវីដេអូដែល នាយចឺម ត្រូវគេវាយនោះផង ។នាយ ថែមទាំងសម្តែងការអាក់អន់ចិត្តដែលម្ចាស់ហាងក៏ដូចជាអ្នកនៅទីនោះមិនឃាត់ ឬ ចេញមុខជួយនៅពេលឃើញហេតុការណ៍បែបនេះ ។
អ្នកនាងចន ច័ន្ទលក្ខិណា ប្រធានសមាគមសិល្បករខ្មែរបានបង្ហើបថា ការដែលនាយចឺមចេញទៅក្រៅរហូតមានការវាយឲ្យរបួសនេះគឺកើតឡើងក្រោយពីមានការបញ្ឆោទលួងលោកឲ្យនាយចឺមចេញទៅជួបជុំអ្នកគាំទ្រមួយក្រុម មិនមែនទៅជួបនារីណាម្នាក់នោះទេ។
គួរបញ្ជាក់ដែរថា អំពើហិង្សាទៅលើតារាចម្រៀងប្រចាំផលិតកម្មសាន់ដេរូបនេះ បានកើតឡើង វេលាម៉ោង៤និង២០នាទីល្ងាចនៅថ្ងៃទី១៨ ខែធ្នូ ឆ្នាំ២០១៩ នៅចំណុចបុរីម្កុដពេជ្រ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។យោងតាមរបាយការណ៍របស់សមត្ថកិច្ចស្នងការនគរបាលខេត្តប៉ៃលិន បានឲ្យដឹងថា ជនសង្ស័យឈ្មោះ ង៉ែត លីទី ភេទប្រុស អាយុ២២ឆ្នាំ គេស្គាល់ថាជាអតីតកីឡាករបាល់ទាត់មួយរូប ធ្លាប់លេងជាច្រើនក្លឹបដូចជាបឹងកេត ក្រសួងការពារជាតិ និងក្លឹបលីកទី៤ថៃ បច្ចុប្បន្នមានមុខរបរ បុគ្គលិកក្រុមហ៊ុន រស់នៅភូមិផ្សារព្រំជើង ឃុំស្ទឹងកាច់ សាលាក្រៅ ខេត្តប៉ៃលិន។ ចំពោះមូលហេតុ ត្រូវបានសមត្ថកិច្ចបញ្ជាក់ថា ដោយសារជនសង្ស័យប្រច័ណ្ឌ នឹងជនរងគ្រោះ រឿងឆាតទៅរកសង្សាររបស់ខ្លួន៕ វឌ្ឍនា
