សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ ដីបឹងធំបឹងតូចជាសម្បត្តិសាធារណៈរបស់រដ្ឋរាប់ពាន់ហិកតា នៅឃុំឈើទាល ឃុំភូមិធំ ឃុំគគីរ និងឃុំដីឥដ្ឋ ត្រូវអ្នកមានលុយមានអំណាច បោះបង្គោលថ្មរំលោភបំពានវាតទីយកធ្វើជាកម្មសិទ្ធិឯកជនយ៉ាងអនាធិបតេយ្យស្ទើរអស់ទៅហើយ ដូច្នេះប្រជាពលរដ្ឋសូមសំណូមពរសម្តេចតេជោ ដែលប្រជាពលរដ្ឋស្រលាញ់អស់ពីចិត្តពីថ្លើមមេត្តាជួយមើលនៅស្រុកកៀនស្វាយនេះផង បើបានជាមានប្រតិកម្មនឹងអ្នកលុបសមុទ្រទៅហើយ ។
ប្រជាពលរដ្ឋអាស្រ័យផលដោយដំណាំនៅបឹងទាំងនេះនិយាយថា បឹងធំបឹងតូចនេះគឺជាបឹងធម្មជាតិ កើតមានតាំងពីដូនតាមកម្លេ៉ះ។ បឹងនេះមានសារសំខាន់ សម្រាប់ប្រជាជន នៃឃុំចំនួន៤រស់នៅជុំវិញមាត់បឹង ដែលជាតម្រូវការចាំបាច់យកទឹកបឹងនេះប្រើប្រាស់ដូចជា មុជដាំស្ល និងស្រោចស្រពផលដំណាំផ្សេងៗ ពិសេសគឺជាបឹងធម្មជាតិដែលប្រជាជន តែងតែប្រកបមុខរបរនេសាទត្រី ដកព្រលិត ដកក្រអៅឈូក រកខ្យងខ្ចៅជាលក្ខណៈគ្រួសារគ្រាន់បានចិញ្ចឹមជីវិតតាំងពីដើមមក ។
មិនតែប៉ុណ្ណោះបឹងនេះគឺជាអាងស្តុកទឹកដ៏ធំ ហើយក៏ជាប្រព័ន្ធរំដោះទឹកជំនន់ នារដូវទឹកដំឡើង ទៅតាមបឹងនានានៃស្រុកស្អាង ស្រុកកោះធំ ស្រុកលើកដែក ហូរធ្លាក់ចេញទៅវៀតណាមផងដែរ ។ ស្រាប់តែឥឡូវនេះបែរជាអ្នកមានលុយមានអំណាច មកបោះបង្គោលថ្មរំលោភបំពានវាតយក ធ្វើជាកម្មសិទ្ធិឯកជនយ៉ាងគឃ្លើនអត់មានលាក់លៀមទេ ដោយខ្លះកំពុងប្រើប្រាស់គ្រឿងចក្រ ជីកកាយចាក់ដីលុបក្លាយជាដីរាបបណ្តើរៗហើយ តែដូចជាពុំឃើញមានអាជ្ញាធរឬមន្ត្រីជំនាញស្ថាប័នណាមួយ ចុះមកទប់ស្កាត់បង្ក្រាបឡើយ ។
ប្រជាពលរដ្ឋនាំគ្ននិយាយថា សកម្មភាពអនាធិបតេយ្យនេះធ្វើឱ្យមហាជនជាច្រើនមានការព្រួយបារម្ភខ្លាំង ខ្លាចទៅថ្ងៃក្រោយគេចាក់ដីលុបបឹងនេះអស់ ប្រជាជនប្រាកដជាជួបការលំបាកគ្មានទឹកប្រើប្រាស់ជាក់ជាមិនខានឡើយ ។ ណាមួយអាចប្រឈមនឹងការលិចលង់ផ្ទះសម្បែង និងផលដំណាំ នៅពេលរដូវទឹកដំឡើងផងក៏មិនដឹង ។
ប្រជាពលរដ្ឋបានលួចបង្ហើបឲ្យដឹងថា អ្នកដែលមកបោះបង្គោលថ្មព័ទ្ធយកដីបឹងខាងលើ និងសកម្មភាពដាក់គ្រឿងចក្រជីកឈូសឆាយភាគច្រើនសុទ្ធតែជាអ្នកមានឋានៈឧកញ៉ា ឯកឧត្តមអ្នកមានលុយមានអំណាចមកពីភ្នំពេញ។ ប្រសិនប្រជាជនធម្មតានោះ គឺមិនអាចទៅបោះបង្គោលព័ទ្ធយកដីសាធារណៈរបស់រដ្ឋបែបនេះបានឡើយ ព្រោះពួកគេស្គាល់ណាស់ថាបឹងសម្រាប់អាស្រ័យផល ។ បញ្ហានេះធ្វើឱ្យមហាជនដាក់ការសង្ស័យថា បើគ្មានការឃុបឃិតត្រូវរូវគ្នាជាប្រព័ន្ធនោះទេ ក៏មិនអាចមកយកដីរដ្ឋឆៅៗបែបនេះបានដែរ ។
ពាក់ព័ន្ធការរំលោភយកដីបឹងធំ-បឹងតូចសាធារណៈរបស់រដ្ឋនេះ ភ្នាក់ងារកាសែតនគរវត្តបានព្យាយាមទូរស័ព្ទ សុំការបំភ្លឺពីលោក អ៊ូ ឈាង អភិបាលស្រុកកៀនស្វាយដែរ តែលោកប្រាប់ថាជាប់រវល់ប្រជុំបក្សក៏ស្ងាត់ឈឹងទៅ ។
ចំណែកលោក កេត សុផល ប្រធានការិយាល័យភូមិបាល ស្រុកកៀនស្វាយ លោកក៏ទទួលស្គាល់ថាដីបឹងធំ-បឹងតូច គឺពិតជាបឹងអាងស្តុកទឹកនិងជាប្រព័ន្ធរំដោះទឹកសាធារណៈរបស់រដ្ឋប្រាកដមែន ហើយបុគ្គលដែលទៅបោះបង្គោលយកដីបឹងនោះ គឺគ្មានច្បាប់ទេ ។
ឥឡូវលោកកំពុងឲ្យក្រុមការងារសិក្សាវាស់វែង និងធ្វើរបាយការណ៍ដាក់ជូនលោកអភិបាលខេត្ត ដើម្បីចុះបញ្ជីរក្សាការពារជាដីរបស់រដ្ឋហើយ ។ ការរំលោភចាក់ដីឈូសឆាយបឹងដ៏មហាសាលបែបនេះ អ្នកធម្មតាមិនអាចថ្លើមពាសមេឃឡើយ។ មហាជនសង្ស័យខ្មោចស្រុកឱ្យដៃ ទើបខ្មោចព្រៃមកពីចម្ងាយហ៊ានធ្វើបែបនេះ ។
យ៉ាងណាប្រជាពលរដ្ឋនិយាយទៀតថា បឹងរាប់ពាន់ហិកតាគេឈូសលុបចង់ជិតទៅហើយ នៅមិនទាន់មានប្រតិកម្មពីម្ចាស់ទឹកម្ចាស់ស្រុកបែបនេះ តើឱ្យមហាជនយល់ឃើញបែបណាទៅវិញ ? ឬមួយចាំគេចាក់លុបពេញសិន ?
ថ្មីនេះសម្តេចតេជោ បានមានប្រតិកម្មនឹងនាយទាហានម្នាក់នៅខេត្តកោះកុងថ្លើមធំហ៊ានចាក់ដីលុបសមុទ្រខុសច្បាប់គ្មានការអនុញ្ញាត និងឲ្យគេកាយដីចេញវិញ។ សម្តេចព្រមាននាយទាហានរូបនេះ ថា មិនអនុញ្ញាតឲ្យមាន ឈ្មោះជានាយទាហានបន្តទៀតនោះទេ «បើទុកយ៉ាងដូច្នេះ ពួកគេនឹងក្លាយជាអ្នកកសាងរដ្ឋនៅក្នុងរដ្ឋហើយមិនអាចអនុញ្ញាតឲ្យមានទេ ។ បើបានជាមានប្រតិកម្មនឹងអ្នកលុបសមុទ្រទៅហើយ សូមសម្តេចតេជោ ដែលប្រជាពលរដ្ឋស្រលាញ់អស់ពីចិត្តពីថ្លើមមេត្តាជួយមើលអ្នកលុបបឹងធម្មជាតិនៅស្រុកកៀនស្វាយនេះផង បើពុំដូច្នោះទេគេឃុបឃិតគ្នាយកបឹងទាំងនេះធ្វើកម្មសិទ្ធិឯកជនខានមានទឹកប្រើប្រាស់ឬបង្កបង្កើនផលអស់ហើយ ៕ ប្រាថ្នា
