សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់បុររសម្នាក់បានស្លាប់ និង២នាក់ទៀតរងរបួសធ្ងន់ ដោយសារគ្រោះថ្នាក់ចរាចរណ៍គួរឲ្យរន្ធត់រវាងរថយន្ត បើកបរក្នុងសភាពស្រវឹងជែងក្នុងស្ថានភាពគ្រោះថ្នាក់ ហើយបានកៀរជាមួយរថយន្ត នៅខាងមុខ រួចជ្រុលចង្កូត បុកបង្គោលគីឡូម៉ែត្រ ហើហើយបានក្រឡាប់ប្រមាណបីបួនត្រឡប់រួចជ្រុលចង្កូត ទៅបុកជាមួយម៉ូតូ ដែលបើកបញ្ច្រាសទិសគ្នា កាលពីវេលាម៉ោង ៣ និង៣០នាទី រសៀល ថ្ងៃទី២៥ ខែធ្នូ ឆ្នាំ២០១៩ នៅលើកំណាត់ផ្លូវជាតិលេខ១៣ ស្ថិតនៅក្នុងភូមិធ្លក សង្កាត់សង្ឃ័រ ក្រុងស្វាយរៀង ខេត្តស្វាយរៀង ។
យោងតាមសមត្ថកិច្ននគរបាលក្រុងស្វាយរៀងបានឲ្យដឹងថា៖ បុរសដែលបានស្លាប់នោះ ឈ្មោះ ឆាយ វណ្ណា អាយុ ៣៤ឆ្នាំ មុខរបរ រត់តាក់ស៊ី មានទីលំនៅ នៅភូមិព្រះទន្លេ សង្កាត់សង្ឃ័រ ក្រុងស្វាយរៀង និងអ្នករួមដំណើរជាមួយ ឈ្មោះ យក់ សារី អាយុ ២៨ឆ្នាំ មុខរបរ រត់ម៉ូតូឌុប មានទីលំនៅ នៅភូមិព្រៃគាវ ឃុំ កំពង់ចក ស្រុករំដូល ខេត្តស្វាយរៀង ។
ចំណែកជនរងគ្រោះអ្នកបើកម៉ូតូមិនត្រូវបានស្គាល់អត្តសញ្ញាណនៅឡើយ ដោយជិះម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ ស្វាយរៀង ១A៤៧៣២ ដោយរបួសធ្ងន់ធ្ងរ សន្លប់នៅនឹងកន្លែង ។
ទាក់ទិននិងករណីគ្រោះថ្នាក់ចរាចរណ៍ ដ៏រន្ធត់នេះ អ្នកឃើញហេតុការណ៍ បានឲ្យដឹងថា មុនពេលកើតហេតុ មានឃើញរថយន្តមួយគ្រឿងម៉ាកតូយ៉ូតា កាមរី (ឆ្លាម) ពណ៌ទឹកមាស ពាក់ស្លាកលេខ ភ្នំពេញ ២I-៦៤៩៩ បើកបរពីទិសខាងត្បូង ទៅទិសខាងជើង លុះមកជិតដល់កន្លែងកើតហេតុ ក៏បានបើកជែងរថយន្តលុចស៊ីស ១គ្រឿង និងបន្តជែងរថយន្តតូយ៉ូតា ហាយឡែនឌ័រ មួយគ្រឿងទៀត បានប៉ះរថយន្ត តូយ៉ូតា ហាយលែនឌ័រ ក៏រេចង្កូតទៅឆ្វេង បុកចំបង្គោលថ្ម គីឡូម៉ែត្រលេខ១ ប៉ើងជាង ១០ ម៉ែត្រ បណ្តាលឲ្យរថយន្តក្រឡាប់ ប្រមាណ បី បួន ត្រឡប់ ទៅបុកជាមួយម៉ូតូ ដែលបើកបញ្ច្រាសទិសគ្នា ដួលខ្ទាតជិត ១០ ម៉ែត្រ បណ្តាលឲ្យអ្នកបើកម៉ូតូ រងរបួសក្បាល និងដៃជើងធ្ងន់ធ្ងរ បង្កការភ្ញាក់ផ្អើលតែម្ដង ។
សមត្ថកិច្ច បានចុះវាស់វែង ហើយសន្និដ្ឋានថា អ្នកបើករថយន្ត បានបើកបរ ដោយស្រវឹង និងបើកល្បឿនលឿន ជែងកន្លែងគ្រោះថ្នាក់ ។ បន្ទាប់ពីវាស់វែង និងធ្វើកំណត់ហេតុរួច សមត្ថកិច្ច បានប្រគល់ឲ្យក្រុមគ្រួសារ យកទៅធ្វើបុណ្យ តាមប្រពៃណី ។ រីឯរថយន្ត និងម៉ូតូ យកទៅរក្សាទុក នៅការិយាល័យនគបាលចរាចរណ៍ ស្នងការដ្ឋាននគបាលខេត្ត រង់ចាំដោះស្រាយតាមច្បាប់ ៕ យឹម សុថាន
