សារព័ត៌មាន នគរវត្ត តែងតែនាំមុខគេជានិច្ច
ខេត្តកែប៖ បុរសម្នាក់ និងស្រ្តីម្នាក់ ជាអ្នកភូមិជាមួយគ្នា ខណៈដែលពួកគាត់ជិះម៉ូតូមួយគ្រឿងចេញពីហូបការគេ ពេលនោះភាគីខាងប្រុសរៀងស្រវឹងស្រឿងៗ កើតតណ្ហាព្យាយាមប៉ុនប៉ងចាប់រំលោភភាគីខាងស្រ្តី ប៉ុន្តែមិនបានសម្រេច ដោយសារជនរងគ្រោះរត់គេចខ្លួនរហូតដល់ផ្ទះ ហើយប្តឹងសមត្ថកិច្ចឲ្យតាមចាប់ខ្លួនបានកាលពីថ្ងៃទី២ ខែមករា ឆ្នាំ២០២០ នៅភូមិកែវក្រសាំង សង្កាត់/ក្រុង/ខេត្តកែប ។
តាមប្រភពព័ត៍មានពីមន្រ្តីនគរបាលខេត្តកែប បានឲ្យដឹងនៅព្រឹកថ្ងៃទី៣ ខែមករា ឆ្នាំ២០២០នេះថា ស្រ្តីរងគ្រោះឈ្មោះ អ អ អាយុ ៣៨ឆ្នាំ រស់នៅភូមិកែវក្រសាំង សង្កាត់/ក្រុង/ខេត្តកែប ។ ចំណែកជនសង្ស័យឈ្មោះ ឈួន វ៉ន ភេទប្រុស អាយុ ៣២ឆ្នាំ រស់នៅភូមិឃុំជាមួយគ្នា ។
ប្រភពដដែលបន្តថា មុនពេលកើតហេតុគឺនៅថ្ងៃទី២៩ ខែធ្នូ ឆ្នាំ២០១៩ ជនសង្ស័យបានដឹកជនរងគ្រោះ មកពីញ៉ាំការគេនៅភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ស្រាប់តែមកដល់ត្រង់ចំណុចខាងលិចភ្នំពោន ភូមិភ្នំលាវ ឃុំពងទឹក ស្រុកដំណាក់ចង្អើរ ។ លុះចប់កម្មវិធីនៅវេលាម៉ោង ៩យប់ ពេលជិះត្រលប់មកផ្ទះវិញ ជនសង្ស័យបានធ្វើសកម្មភាពប៉ុនប៉ងចាប់រំលោភ ប៉ុន្តែមិនបានសម្រេច ព្រោះជនរងគ្រោះរត់គេចរួចខ្លួនទៅដល់ផ្ទះ ។រហូតថ្ងៃទី២ ខែមករា ឆ្នាំ២០២០ ទើបជនរងគ្រោះទៅដាក់ពាក្យបណ្ដឹង នៅប៉ុស្តិ៍រដ្ឋបាលសង្កាត់កែប ដោយហេតុការណ៍នេះ កើតឡើងក្នុងទឹកដីឃុំពងទឹក ទើបកម្លាំងនគរបាលប៉ុស្តិ៍ទាំង២ សហការជាមួយការិយាល័យព្រហ្មទណ្ឌកម្រិតធ្ងន់ កោះហៅជនសង្ស័យ និងជនរងគ្រោះមកសាកសួរបំភ្លឺ ឃើញថា ចម្លើយអ្នកទាំង២ ស៊ីសង្វាក់គ្នា ព្រមទាំងជនសង្ស័យឆ្លើយសារភាពថា ខ្លួនពិតជាបានធ្វើសកម្មភាពប៉ុនប៉ងចាប់រំលោភសេពន្ថវ:ពិតប្រាកដមែន ។
បច្ចុប្បន្នជនសង្ស័យ នៅព្រឹកថ្ងៃទី៣ ខែមករា ឆ្នាំ២០២០នេះ សមត្ថកិច្ចជំនាញបានបញ្ជូនទៅសាលាដំបូងខេត្តកំពត ដើម្បីទទួលទោសតាមច្បាប់ ៕ ប្រាថ្នា
