សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានគ្រោះថ្នាក់ចរាចរណ៍បង្កការភ្ញាក់ផ្អើលទាំងព្រឹក រវាងម៉ូតូសិស្សសាលា២នាក់ជិះឌុបគ្នាទៅរៀនបើកខ្វះការប្រុងប្រយ័ត្នជ្រុលទៅបុករថយន្តដែលជិះបញ្ច្រាសទិសគ្នាបណ្ដាលឲ្យស្លាប់ម្នាក់ និងម្នាក់ទៀត រងរបួសធ្ងន់ ត្រូវបានបញ្ជូនទៅជួយសង្គ្រោះភ្លាមភ្លាម ។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៧និង២០នាទី ថ្ងៃទី១៦ ខែមករា ឆ្នាំ ២០២០ ស្ថិតនៅក្នុងភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
សមត្ថកិច្ចបញ្ជាក់ថា សពជនរងគ្រោះមានឈ្មោះ ចាន់ អេលីសាប៊ែត ភេទស្រី អាយុ១៥ឆ្នាំ ស្នាក់នៅភូមិក្រាំងស្វាយ សង្កាត់ព្រែកកំពឹស ខណ្ឌដង្កោ និងប្អូនស្រីរបស់ជនរងគ្រោះម្នាក់ទៀត ជិះពីក្រោយ រងរបួសធ្ងន់ឈ្មោះ ចន ហ្គោដាមាល អាយុ ១៤ឆ្នាំ ស្នាក់នៅជាមួយគ្នា ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវតី ២នាក់ ជិះម៉ូតូជិះម៉ូតូមួយគ្រឿងម៉ាកស្មាស់ ពណ៌ខ្មៅ ពាក់ស្លាកលេខ ភ្នំពេញ 1CV-9295 ជិះដោយយុវតី២នាក់ឌុបគ្នាជាសិស្សសាលាព្រែកកំពឹស បានធ្វើដំណើរតាមបណ្ដោយផ្លូវជាតិលេខ២ ទិសដៅពីលិចមកកើត ខណៈដល់ចំណុចកើតហេតុបានជែងរថយន្តមួយគ្រឿងខាងមុខជ្រុលទៅបុករថយន្តដឹកសិស្សសាលាមួយគ្រឿងម៉ាកសាំងយ៉ុងពណ៌សពាក់ស្លាកលេខ ភ្នំពេញ 2AK-7543 បើកបរដោយយុវជនម្នាក់ធ្វើដំណើរបញ្រ្ចាសទិគ្នា ពេញទំហឹងបណ្ដាលឲ្យបណ្ដាលឲ្យយុវតីម្នាក់ស្លាប់ភ្លាមៗ និងយុវតីម្នាក់ទៀតរងរបួសធ្ងន់ត្រូវបានបញ្ជូនទៅកាន់មន្ទីរពេទ្យដើម្បីជួយសង្គ្រោះ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ជួយសម្រួលចរាចរណ៍ទំនាក់ទំនងទៅសមត្ថកិច្ចជំនាញចុះមកដល់ទីតាំងកន្លែងកើតហេតុ វាស់វែងយករថយន្ត និងម៉ូតូជនរងគ្រោះយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការរដ្ឋាននគរបាលរាជធានីភ្នំពេញ រង់ចាំដោះស្រាយនៅពេលក្រោយចំណែកសពសមត្ថកិច្ចធ្វើកំណត់ហេតុរួចប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕ ភារ៉ា ដង្កោ
