សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលប៉ុស្តិ៍ភ្នំពេញថ្មី ឃាត់ខ្លួនជនសង្ស័យ ម្នាក់ដកហូតបានថ្នាំញៀនមួយចំនួនធំ និងម៉ូតូមួយគ្រឿង។
ប្រតិបត្តិការនេះធ្វើឡើង នៅម៉ោងរំលងអធ្រាត្រ ឈានចូលថ្ងៃទី១៦ ខែមករា ឆ្នាំ២០២០ នៅតាមបណ្តោយផ្លូវលេខ ១៩៨៦ មុខ មជ្ឈមណ្ឌល ខេតថល ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យមានឈ្មោះ ពឹង គឹងហ័ង អាយុ ៣០ ឆ្នាំជាង មុខរបរជាកសិករ ស្នាក់នៅភូមិព្រែកតាមាក់ ស្រុកខ្សាច់កណ្ដាល ខេត្តកណ្ដាល។
ប្រភពព័ត៌មានពីសមត្ថកិច្ចបានឲ្យដឹងថា មុននឹងឃាត់ខ្លួនជនសង្ស័យរូបនេះកម្លាំងប៉ុស្តិ៍នគរបាលភ្នំពេញថ្មី បានល្បាតក្នុងភូមិសាស្ត្រដើម្បីទប់ស្កាត់បទល្មើសផ្សេងៗ នៅតាមបណ្តោយផ្លូវលេខ១៩៨៦ ក៏បានប្រទះឃើញ ជនសង្ស័យម្នាក់បើកម៉ូតូធំម៉ាក kawasaki មួយគ្រឿងពណ៌សពាក់ស្លាកលេខភ្នំពេញ1CA-4454 ធ្វើដំណើរតាមបណ្តោយផ្លូវលេខ ១៩៨៦ក្នុង ទិសដៅពីកើតមកលិច ដោយកម្លាំងមានការសង្ស័យបានបើកម៉ូតូដេញតាមមក ដល់ចំណុចកើតហេតុបានឃាត់ម៉ូតូជនសង្ស័យឲ្យឈប់រួចចាប់ឆែកឆេរនៅ នឹងខ្លួនជនសង្ស័យក៏ប្រទះឃើញថ្នាំញៀនដាក់នៅ ក្នុងកាបូបស្ពាយ១កញ្ចប់ធំ ត្រូវបានកម្លាំងសមត្ថកិច្ចចាប់វាយខ្នោះតែម្ដង។
បើតាមចម្លើយជនសង្ស័យបានប្រាប់ឲ្យដឹងថា ថ្នាំញៀនមួយកញ្ចប់ធំនេះ ត្រូវបានបុរសម្នាក់នៅឯស្រុកកំណើត ប្រើរូបគេឲ្យយកទៅឲ្យម៉ូយនៅម្តុំផ្សារហុយក្រុងភ្នំពេញ មិនទាន់ដល់ផងត្រូវបានសមត្ថកិច្ចឃាត់ខ្លួនតែម្ដង។
បន្ទាប់ពីឃាត់ខ្លួនជនសង្ស័យរួមនឹងវត្ថុតាង ត្រូវបានសមត្ថកិច្ចបញ្ជូនខ្លួនទៅអធិការនគរបាលខណ្ឌសែនសុខ ដើម្បីសួរនាំបន្ត និងស្រាវជ្រាវរកចាប់ខ្លួនបក្ខពួកបន្ថែមទៀតយកមកផ្តន្ទាទោសទៅតាមផ្លូវច្បាប់ ៕ ជ្រោយពេជ្រ
