សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនខ្មែរឥស្លាមម្នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ធ្ងរ ត្រូវបញ្ជូនទៅសង្គ្រោះភ្លាមៗនៅមន្ទីរពេទ្យ ខណៈជិះម៉ូតូឌុបគ្នាមិនប្រយ័ត្នដល់ចំណុចផ្លូវបំបែកជាបួន ក៏បុកជាមួយរថយន្តពេញទំហឹង កាលពីវេលាម៉ោង១០យប់ ថ្ងៃទី១៦ ខែមករា ឆ្នាំ២០២០ ចំណុចផ្លូវលេខ១៩៣ កែងនឹងផ្លូវលេខ៣៨៨ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។
ជនរងគ្រោះឈ្មោះអ៊ីស្មា អែល ភេទប្រុស អាយុ១៦ឆ្នាំ ជាជនជាតិខ្មែរឥស្លាមមានស្រុកកំណើតនៅភូមិវិហាសំបូ ឃុំរកាពុកប្រាំ ស្រុកត្បូងឃ្មុំ ខេត្តកំពង់ចាម ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជន២នាក់ជិះម៉ូតូម៉ាកហុងដាឌ្រីម សង់ស៊េរីឆ្នាំ ២០១៣ ពណ៌ខ្មៅ ពាក់ស្លាកលេខ ភ្នំពេញ 1AU 8514 ធ្វើដំណើរតាមបណ្តោយផ្លូវលេខ៣៨៨ ក្នុងទិសដៅពីជើងទៅត្បូង ខណៈមកដល់ចំណុចផ្លូវបំបែកជាបួនមិនប្រយ័ត្នក៏ជ្រុលបុកជាមួយរថយន្តម៉ាកហ៊ីយ៉ាន់ដាយ ស៊េរីទំនើប ពណ៌ស ពាក់ស្លាកលេខ ភ្នំពេញ 2AJ 8350 ធ្វើដំណើរតាមបណ្តោយផ្លូវលេខ១៩៣ក្នុងទិសដៅពីកើតទៅលិច បណ្តាលឲ្យយុវជនម្នាក់បានស្លាប់ភ្លាមៗនៅកន្លែងកើតហេតុ ចំណែកម្នាក់ទៀតរងរបួសធ្ងន់ធ្ងរត្រូវបញ្ជូនទៅសង្គ្រោះភ្លាមៗ ។
ក្រោយកើតហេតុ សមត្ថកិច្ចបានចុះមកដល់ចំណុចកើតហេតុ និងប្រគល់សពទៅក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើតចំណែករថយន្ត និងម៉ូតូត្រូវបានជំនាញវាស់វែងយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយតាមច្បាប់ ៕ សុខា សែនជ័យ
