សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ ពីរនាក់បងថ្លៃ និងប្អូនថ្លៃនាំគ្នាបើកគោយន្តកន្ត្រៃដឹកអុសពេញ បើកឡើងផ្លូវក្រួសក្រហមមិនរួច ក៏រអិលកង់គោយន្តថយក្រោយកិនបងថ្លៃស្លាប់នៅនឹងកន្លែងកើតហេតុ ។ ហេតុការណ៍នេះបានកើតឡើងកាលពីវេលាម៉ោង ១២ និង ១០នាទី ថ្ងៃទី២២ ខែមករា ឆ្នាំ ២០២០ នៅចំណុចភូមិស្រើង ឃុំស្រើង ស្រុកប្រាសាទសំបូរ ខេត្តកំពង់ធំ ។
សមត្ថកិច្ចបានឲ្យដឹងថា ជនរងគ្រោះ ឈ្មោះ ពៅ ភេទប្រុស អាយុ ៣៦ឆ្នាំ ត្រូវជាបងថ្លៃ និងម្នាក់ទៀត ឈ្មោះ ថោ ធា ភេទ ប្រុស អាយុ ២៣ឆ្នាំ ត្រូវជាប្អូនថ្លៃ ទាំងពីរនាក់ រស់នៅភូមិសាលាសន្ទុក ឃុំកកោះ ស្រុកសន្ទុក ខេត្តកំពង់ធំ ។ ពួកគេបានបើកគោយន្តកន្ត្រៃ មកកាប់អុស នៅខាងលិចភូមិស្រើង ឃុំស្រើង ស្រុកប្រាសាទសំបូរ ខេត្តកំពង់ធំ ចម្ងាយ ១២០០ម៉ែត្រ ពេលរកអុសពេញគោយន្តហើយ ក៏បើកគោយន្ត មកឡើងផ្លូវក្រួសក្រហម ដោយដឹកធ្ងន់ពេកគោយន្តឡើងមិនរួច ប្អូនថ្លៃឈ្មោះ ថោ ធា បាន ឲ្យឈ្មោះ ពៅ ដែលត្រូវជាបងថ្លៃ យកឈើទៅកល់កង់គោយន្ត កល់កង់មិនជាប់គោយន្ត ក៏រអិលមកក្រោយបានជាន់ ឈ្មោះ ពៅ បណ្ដាលឲ្យស្លាប់នៅនឹងកន្លែងកើតហេតុ ។
ក្រោយទទួលព័ត៌មានភ្លាមសមត្ថកិច្ចបានចុះទៅដល់ទីកន្លែងកើត ហេតុ ហើយបានពិនិត្យសាកសព ឃើញថាពុំមានពាក់ព័ន្ធនឹងបទល្មើសអ្វីទេ ។ បន្ទាប់ពីបានពិនិត្យចប់សព្វគ្រប់រួចហើយយើងបានធ្វើកំណត់ហេតុប្រគល់សាកសពជូនក្រុមក្រួសារដើម្បីធ្វើបុណ្យតាមប្រពៃណី ៕ ប៊ុនរិទ្ធី
