រថយន្ដដឹកជ្រូក៣០០ក្បាលក្រឡាប់ផ្ងារជើង ងាប់ជ្រូកអស់៨៧ក្បាល នៅស្រុកវ៉ារិន

ខេត្តសៀមរាប៖ រថយន្តមួយគ្រឿងដឹកជ្រូកក្រឡាប់ផ្ងារជើង កាលពីវេលាម៉ោង០៨ និង២០នាទីថ្ងៃទី៣០ ខែមករា ឆ្នាំ២០២០ នៅចំណុច ភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប ។

សមត្ថកិច្ចបានឲ្យដឹងថា រថយន្ដមួយគ្រឿងម៉ាក.ប៉េអង ពណ៌ស ពាក់ស្លាកលេខ ភ.ព 3F0539 បើកបរដោយឈ្មោះ យ៉ុន ចាន់ថុល ភេទប្រុស អាយុ៤៣ឆ្នាំ រស់នៅ ខណ្ឌមានជ័យ ក្រុងភ្នំពេញ និងមានថៅកែ ឈ្មោះ ចែធំ បានដឹកជ្រូកចំនួន៣០០ក្បាល ក្រោយពីក្រឡាប់ជ្រូកងាប់អស់ចំនួន៨៧ក្បាល ចំនែកអ្នកបើកបរពុំមានគ្រោះថ្នាក់អ្វីទេ ។

លោក វរទោ ហុង ប៉ូហេង អធិការនគរបាលស្រុកវ៉ារិនបានឲ្យដឹងតាមទូស័ព្ទនៅថ្ងៃទី៣០ ខែមករា ឆ្នាំ២០២០ នេះថារថយន្ដដឹកជ្រូកពីច្រកអូរស្មាច់ មានច្បាប់ត្រឹមត្រូវ តែមូលហេតុដែលរថយន្ដដឹកជ្រូកនេះក្រឡាប់គឺបណ្ដាលមកពីរដល់ចំណុចផ្លូវកោងធ្វើឲ្យរបូតទំពង់ហើយក៏ ធ្វើឲ្យក្រឡាប់រថយន្ដ ក្បាលរថយន្ដទៅផ្សេង ចំណែកទ្រុងទៅផ្សេង ។

បច្ចុប្បន្ន រថយន្ត និងជ្រូកត្រូវបានប៉ូលីសចរាចរណ៍ជួយមើលថែនៅកន្លែងកើតហេតុ ៕ ប៊ុនរិទ្ធី