សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង ៖ នៅសុខៗស្រាប់តែមានអគ្គិភ័យមួយឆេះឡើង នៅខាងក្រោយមន្ទីរកសិកម្ម រុក្ខាប្រមាញ់ និងនេសាទខេត្ត ហើយភ្លាមៗកម្លាំងរថយន្តពន្លត់អគ្គិភ័យ នៃស្នងការដ្ឋាននគរបាលខេត្ត បានមកអន្តរាគមន៍បាញ់ពន្លត់ទាន់ពេល ។ ហេតុការណ៍នេះកើតឡើងនៅវេលាម៉ោង១១ព្រឹក ថ្ងៃទី៦ ខែកុម្ភៈ ឆ្នាំ២០២០ ស្ថិតនៅភូមិស្រែពោធិ សង្កាត់ស្រះប្ញស្សី ក្រុង ខេត្តស្ទឹងត្រែង ។
បើតាមលោកស្នងការនគរបាលខេត្តបានឲ្យដឹងថា ភ្លើងឆេះនៅខាងក្រោយអគារមន្ទីរកសិកម្មខាងលើ ត្រូវបានខាងកម្លាំងស្នងការដ្ឋាននគបាលខេត្ត បញ្ចាកម្លាំងចេញទៅបាញ់ទឹកពន្លត់ទាន់ពេលវេលា និងគ្រប់គ្រងស្ថានការណ៍បានទាំងស្រុង។
ក្នុងករណីនេះ លោកថា អាចទាក់ទិនករណីអគ្គិភ័យខាងលើនេះដែរ លោកដាក់ការសង្ស័យ និងការសន្និដ្ឋាន អាចមានមានពីរចំណុច ទី១-គឺមានមនុស្សចូលមកលួចដុត និងទី២-អាចមកពីកម្ទេចភ្លើងសេសសល់ពីដុតកាកសំណល់សំរាម នៅមានភ្លើងឆេះមិនទាន់រលត់អស់ ។
លោកបន្តទៀតថា ប៉ុន្តែបើតាមសាក្សីម្នាក់បានប្រាប់មន្ត្រីនៃមន្ទីរកសិកម្មរុក្ខាប្រម៉ាញ់ និងនេសាទ និងសមត្ថកិច្ចថា មុនពេលមានភ្លើងឆេះ គេបានឃើញក្មេងវ័យជំទង់ ២នាក់ដើរចូលមកលេងក្បែរនោះ ក្រោយមកស្រាប់តែមានភ្លើងឆេះហើយបាត់ពួកគេអស់ទៅ ។
ប្រភពបន្តថា ភ្លើងឆេះចេញពីទូកស្មាច់ដែលរក្សាទុក នៅក្រោយអគាររហូតរាលបន្តទៅដល់សំណល់គំនរឈើដែលសេសសល់ ពីធ្វើអាគារថ្មី ទើបមានការភ្ញាក់ផ្អើលឆោឡោតែម្តង ។
កម្ត្រីនៃមន្ទីរកសិកម្មខេត្តបានឲ្យដឹងថា ការខាតបង់នោះគឺទូកស្មាច់ថ្មីចំនួន៤គ្រឿង ដែលមានតម្លៃប្រហែលជិត៣ពាន់ដុល្លារ ជាជំនួយរបស់អង្គការដៃគូរ បានប្រគល់មកឲ្យខណ្ឌរដ្ឋបាលជលផល សម្រាប់ចែកជូនសហគមន៍នេសាទ ដើម្បីចុះល្បាតការពារធនធានជលផល ក្រៅពីនោះមិនមានខាតបង់អ្វីធ្ងន់ធ្ងរឡើយ ។ បច្ចុប្បន្ន សមត្ថកិច្ចកំពុងស្រាវជ្រាវរកមូលហេតុបន្ត ៕ មាស សុផាត
