សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីដ៏ស្រស់ស្អាតម្នាក់បានដាច់ខ្យល់ស្លាប់គួរឲ្យ អាណោចអាធម័ បន្ទាប់ពីបើករថយន្តមួយគ្រឿងបោះពួយយ៉ាងលឿនជ្រុលទៅបុក របាំងថ្មពុះចែកទ្រូងផ្លូវពេញទំហឹង បណ្តាលឲ្យរថយន្តក្រឡាប់ផ្ងារជើងឡើងលើ កាលពីវេលា ម៉ោង២ និង២០នាទី រំលងអធ្រាត្រឈានចូលថ្ងៃទី១៣ ខែកុម្ភៈ ឆ្នាំ២០២០ ស្ថិតតាមបណ្ដោយផ្លូវ២១៧ ចំណុចគល់ស្ពានស្ទឹងមានជ័យ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
សពជនរងគ្រោះមានឈ្មោះ ហុង វ៉ានដូ ភេទស្រី អាយុ២៥ឆ្នាំ មុខរបររៀនខាងសំអាងការ នៅម្តុំផ្សារថ្មី រស់នៅក្នុងបុរីពិភពថ្មី ចំការដូង ផ្ទះលេខ២៦៣ ផ្លូវលេខ១៣ ជិះរថយន្តម៉ាក ម៉ាស្តារ ពណ៌ស ពាកស្លាកលេខ ភ្នំពេញ2AQ 6626 បើកតែម្នាក់ឯង ។
តាមសម្តីប្អូនស្រីម្នាក់ដែលឃើញហេតុការណ៍បានឲ្យដឹងថា មុនពេលកើតហេតុ រូបគាត់បានឃើញនារីដ៏ស្រស់ស្អាត ម្នាក់បើករថយន្តម៉ាស្ដារ តាមបណ្តោយផ្លូវ២១៧ក្នុងទិសដៅពីត្បូងទៅជើងក្នុងល្បឿនលឿន ខណៈមកដល់ចំណុចកើតហេតុខាងលើបានរេចង្កូតមកខាងឆ្វេងដៃ ទៅបុកក្បាលថ្មពុះចែកទ្រូងផ្លូវពេញទំហឹង រថយន្តក្រឡាប់ផ្ងារជើងទ្រមេឃ បណ្ដាលឲ្យម្ចាស់រថយន្តរងរបួសធ្ងន់ត្រូវបានរថយន្តគ្លីនិចឯកជនសួគ៌ាដឹកទៅសង្គ្រោះ ដោយស្ថានភាពរបួសធ្ងន់ធ្ងរពេក ក៏បានដាច់ខ្យល់ស្លាប់ក្នុងមន្ទីរពេទ្យ ។
ក្រោយកើតហេតុ សមត្ថកិច្ចមូលដ្ឋាន ក៏បានទាក់ទងទៅជំនាញចរាចរណ៍ក្រុងមកស្ទូចយករថយន្តទៅរក្សារទុករង់ចាំដោះស្រោយនៅពេលក្រោយ ។ ចំណែកសពរងគ្រោះក្រោយពីសមត្ថកិច្ចធ្វើកំណត់ហេតុរួចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕ ភារ៉ា ដង្កោ
