សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់បុរស៥នាក់ បានរងរបួសធ្ងន់ស្រាល ចំណែករថយន្តខូចខាតមួយគ្រឿងដោយសារធ្លាយធុងហ្គាសចេញពីរថយន្តបាញ់ចំកន្លែងអាំងសាច់គោក្នុងពិធីបុណ្យនៅផ្ទះអ្នកភូមិបង្កអោយឆាបឆេះផ្អើលអស់ភ្ញៀវនាំគ្នាជួយពន្លត់ និងរាយការណ៍មកសមត្ថកិច្ចមកអន្តរាគមន៍ ដឹកមកសង្គ្រោះនៅមន្ទីរពេទ្យបង្អែក ខេត្តស្វាយរៀង ។
ហេតុការណ៍នេះបានកើតឡើងកាលពីវេលាម៉ោង៦ល្ងាច ថ្ងៃទី២២ ខែកុម្ភៈ ឆ្នាំ២០២០ ស្ថិតនៅចំណុចភូមិសំឡីខាងត្បូង ឃ៉ំសំឡី ស្រុកកំពង់រោទ៍ ខេត្តស្វាយរៀង ។
បើតាមសមត្ថកិច្ចនគរបាលស្រុកបានអោយដឹងថាបុរសរងគ្រោះ ទាំង៥នាក់មាន១ ឈ្មោះ សៅ ចិន្តាភេទប្រុស អាយុ៤៣ឆ្នាំ មុខរបរកសិករ, ទី២ ឈ្មោះរឿន រិទ្ធ ភេទប្រុស អាយុ៣៧ឆ្នាំ, ទី៣ ឈ្មោះ សុកសុតុត ភេទប្រុស អាយុ៣៦ឆ្នាំ, ទី៤ ឈ្មោះ រី សំណាង ភេទប្រុស អាយុ ៣៤ឆ្នាំ, អ្នកទាំង៤ រស់ក្នុងនៅភូមិប្រាសាទ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ និងទី៥ ឈ្មោះ នុត ស្រស់ភេទប្រុស អាយុ ៤៣ឆ្នាំ មានទីលំនៅភូមិ ឃុំកេីតហេតុខាងលើ ។
ចំណែករថយន្ត ម៉ាកតូយ៉ូតា តាកូម៉ា ពាក់ស្លាកលេខកំពង់ធំ ២A១៨៥៨ ខូចខាតផ្នែកខាងក្រោយទាំងស្រុង ។
ប្រភពបន្តថា ក្នុងភូមិខាងលើមានពិធីបុណ្យនៅផ្ទះឈ្មោះ សៅ សារឿន ភេទប្រុស ខណៈបានយករថយន្តម៉ាកតូយ៉ូតាតាកូម៉ា ស្លាកលេខកំពង់ធំ ២A១៨៥៨ ដែលដឹកហ្គាសសម្រាប់ចំអិនម្ហូបផ្សេងៗក្នុងពិធី ។
ប្រភពបន្តថា ក្រោយមក ស្រាប់តែធ្លាយហ្គាសចេញពីរថយន្តបាញ់ទៅចំកន្លែងចំអិនអាំងសាច់គោចម្ងាយ ០៧ម៉ែត្រ បណ្តាលអោយផ្ទុះឆាបឆេះបង្កអោយមានមនុស្សជាច្រើននាក់ដែលនៅកន្លែងនោះរងរបួស និងឆាបឆេះរថយន្តផងដែរ ។
បច្ចប្បន្ន បុរសរងរបួសទាំង៥នាក់ ដែលរងរបួសធ្ងន់ស្រាល ត្រូវបានក្រុមគ្រួសារបញ្ជួនទៅព្យាបាលនៅមន្ទីរពេទ្យខេត្តស្វាយយរៀងភ្លាមៗផងដែរ ៕ យឹមសុថាន
