សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោក សរ សុដានី អភិបាលរងក្រុងស្វាយរៀងស្នើដល់ប្រជាពលរដ្ឋត្រូវត្រៀមឯកសារពាក់ព័ន្ធ នឹងព្រំប្រទល់ដីឲ្យបានច្បាស់លាស់សម្រាប់ការចុះបញ្ជីដីធ្លីជាលក្ខណៈប្រព័ន្ធ ។
មានប្រសាសន៍ថ្លែងនៅក្នុងកិច្ចប្រជុំផ្សព្វផ្សាយសេចក្តីប្រកាសកំណត់តំបន់វិនិច្ឆ័យ សម្រាប់ការចុះបញ្ជីដីធ្លីមានលក្ខណៈជាប្រព័ន្ធ នៅសង្កាត់ព្រៃឆ្លាក់ក្រុងស្វាយរៀង ខេត្តស្វាយរៀងកាលពីព្រឹកថ្ងៃ២៥ ខែកុម្ភៈ ឆ្នាំ២០២០ នៅទីធ្លារវត្តព្រៃឆ្លាក់ ។
ក្នុងឱកាសនោះ ក៏មានការចូលរួមពីសំណាក់លោក អ៊ូ សុភក្ដី អនុប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តស្វាយរៀង និងអស់លោកលោកស្រីមន្ទីពាក់ពន្ធ័លោកចៅសង្កាត់ និងប្រជាពលរដ្ឋយ៉ាងច្រើនកុះករ ។
លោកអភិបាលរងក្រុងស្វាយរៀងបានបន្តថា៖ ការចុះបញ្ជីដីធ្លីជាលក្ខណៈប្រព័ន្ធមានសារៈសំខាន់ណាស់សម្រាប់បងប្អូនប្រជាពលរដ្ឋ ព្រោះថាបងប្អូនប្រជាពលរដ្ឋនឹងមាន ប័ណ្ណកម្មសិទ្ធិកាន់កាប់ដីធ្លីដោយស្របច្បាប់ សម្រាប់ដាក់បញ្ចាំខ្ចីប្រាក់ពីធនាគារសម្រាប់ប្រកបមុខរបរផ្សេងៗ, សម្រាប់ចែកបន្តដល់កូនចៅ ពិសេសមិនមានអ្នកណាអាចរំលោភបំពានបានឡើយ ។
លោក សរ សុដានី ក៏បានផ្តាំផ្ញើរដល់បងប្អូនប្រជាពលរដ្ឋដែលបានចូលរួម ត្រូវបន្តជួយផ្សព្វផ្សាយបន្តអ្នកដទៃទៀត ដែលមិនបានមកចូលរួមឲ្យបានយល់ដឹងអំពីនីតិវិធីនៃការចុះបញ្ជីដីធ្លីមានលក្ខណៈជាប្រព័ន្ឋ និងសំណូមពរដល់អាជ្ញាធរគ្រប់លំដាប់ថ្នាក់ ស្ថាប័នពាក់ព័ន្ឋ រួមទាំងប្រជាពលរដ្ឋអ្នកកាន់កាប់ដីនៅក្នុងតំបន់វិនិច្ឆ័យនេះ សូមជួយផ្តល់ភាពងាយស្រួល និងចូលរួមសហការឲ្យបានល្អជាមួយក្រុមការងារចុះបញ្ជីដីធ្លី ដើម្បីឲ្យការអនុវត្តនីតិវិធីនៃការចុះបញ្ជីដីធ្លីមានលក្ខណៈជាប្រព័ន្ឋប្រព្រឹត្តទៅដោយរលូន និងជោគជ័យ ៕ យឹម សុថាន
