សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ មន្ទីរសាធារណការនិងដឹកជញ្ជូនខេត្តព្រះវិហារ បានបញ្ជូនគ្រឿងចក្រនិងអ្នកបច្ចេកទេសទៅដល់ទីតាំងស្ពានស្ទឹងស្តៅ ដែលរងការឆាបឆេះដោយសារភ្លើងឆេះព្រៃ នៅក្នុងស្រុកសង្គមថ្មីប៉ុន្មានថ្ងៃមុននេះហើយ ប្រយោជន៍ធ្វើការសាងសង់ស្ពាននេះឡើងវិញ ។ នេះបើតាមលោក សំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារ បានឱ្យដឹងនៅរសៀលថ្ងៃទី២៥ខែកុម្ភៈឆ្នាំ២០២០នេះ ។
លោកប្រធានមន្ទីបានគូសបញ្ជាក់បន្ថែមថា ជាជំហានដំបូងមុននឹងធ្វើការស្ថាបនាសាងសង់ស្ពានស្ទឹងស្តៅនេះឡើងវិញហើយក្រុមការងារកំពុងតែមមាញឹកក្នុងការបោសសម្អាត បរិវេណនៅជុំវិញឱ្យបានស្អាតល្អសិន ដូចជាសម្អាតទីតាំងស្ពានចាស់ដែលបានឆេះនិងសម្អាតគុម្ពឫស្សីនិងដើមឈើងាប់ផ្សេងៗទៀតចៀសវាងមានការឆេះព្រៃរាលមកម្តងទៀត។
សូមបញ្ជាក់ថា ស្ពានស្ទឹងស្តៅនេះត្រូវបានភ្លើងឆេះព្រៃរាលដាលមកដល់បណ្តាលឱ្យឆាបឆេះដោយមិនអាចជួយពន្លត់បាន។ស្ពាននេះក៏មានសភាពចាស់ទ្រុឌទ្រោមហើយដែរដោយមិនអាចធ្វើចរាចរណ៍បានទេ។ដោយឡែកអាជ្ញាធរខេត្តក៏មានគម្រោងរុះរើស្ពាននេះដើម្បីសាងសង់ស្ពានដែកបេឡេជំនួសវិញតាមការសំណូមពររបស់ប្រជាពលរដ្ឋក្នុងអង្គវេទិកាសាធារណៈដោយវត្តមាន ទេសរដ្ឋមន្ត្រីមាស សុភា ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តព្រះវិហារ។
ប៉ុន្តែមិនទាន់បានរុះរើសាងសង់ថ្មីផងជាអកុសលស្ពាននេះបានរងការឆាបឆេះដោយសារភ្លើងឆេះព្រៃរាលដាលមកដល់។ ដោយឡែក កាលពីពេលថ្មីៗនេះ លោក ប្រាក់ សុវណ្ណ អភិបាលខេត្តព្រះវិហារ បានដឹកនាំក្រុមការងារ និងមន្ត្រីជំនាញចុះមកពិនិត្យដោយផ្ទាល់ដល់ទីតាំងស្ពានស្ទឹងស្តៅដែលរងការឆេះដោយភ្លើងព្រៃនេះ និងមានផែនការធ្វើស្ពាននេះឡើងវិញ ៕ ប្រាថ្នា
