សារព័ត៌មាន នគរវត្ត តែងតែនាំមុខគេជានិច្ច
ក្រុងវ៉ាសុីនតោន៖ក្រោយមានករណីស្លាប់ដោយសារតែជំងឺផ្លូវដង្ហើមថ្មី បង្កឡើងដោយវីរុស កូវីដ-១៩ ទីក្រុងវ៉ាស៊ីនតោន បានប្រកាសអាសន្នជាបន្ទាន់ ។ ជាមួយគ្នានោះរដ្ឋាភិបាលបានកាត់បន្ថយការធ្វើដំណើរអន្តរជាតិ។
នៅក្នុងសន្និសីទកាសែត ក្រោយមានអ្នកស្លាប់ ប្រធានាធីបតីដូណាលត្រាំ បានឲ្យដឹងថា អ្នកស្លាប់ ដោយកូវីដ-១៩គឺជាបុរសមានអាយុ៥០ឆ្នាំ ដោយបុរសរូបនេះមានបញ្ហាសុខភាព។លោកត្រាំបានស្នើដល់ពលរដ្ឋរក្សាការអត់ធ្មត់ កុំភ័យខ្លាច។ តាមសារព័ត៌មាន USA today បានផ្សាយថា នេះមិនមែនជាករណីជនជាតិអាមេរិកទីមួយស្លាប់នោះឡើយ កន្លងមក ក៏មានជនជាតិអាមេរិកដំបូង មានអាយុ៦០ឆ្នាំស្លាប់កាលពីខែកុម្ភៈ នៅទីក្រុងវូហាន។ បច្ចុប្បន្ននៅមានជនជាតិអាមេរិកម្នាក់ទៀត អាយុ៧០ឆ្នាំ ស្ថិតនៅក្នុងស្ថានភាពធ្ងន់ធ្ងូក្រោយឆ្លងកូវីដ-១៩។
គិតមកដល់ព្រឹកថ្ងៃទី១ខែមីនា អាមេរិកមានករណីឆ្លងវីរុសកូវីដ-១៩កើនឡើង៦៨ករណីហើយ ប៉ុន្តែអ្នកឆ្លងភាគច្រើន មកពីនាវាទេសចរណ៍ Diamond Princess ដែលរដ្ឋាភិបាលអាមេរិក ដឹកបញ្ជូនមកពីប្រទេសជប៉ុន។
បច្ចុប្បន្ន កូវីដ-១៩ បានរាលដាលដល់៦៤ប្រទេសជុំវិញពិភលោក ដោយមានអ្នកឆ្លងវីរុសនេះ ដល់ទៅជាង៨៦ពាន់នាក់និងជិត៣ពាន់នាក់ស្លាប់ ភាគច្រើននៅក្នុងប្រទេសចិន ៕ ម៉ែវ សាធី
