សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រជាពលរដ្ឋមួយចំនួនដែលទិញអាល់កុល តាមការឡាយលក់តាមប្រព័ន្ធអនឡាញ ត្រូវតែប្រុងប្រយ័ត្ន ព្រោះអាល់កុលទាំងនោះ មិនបានឆ្លងកាត់ការ ពិសោធន៍ គឺជាផលិតផលក្លែងក្លាយ និងប៉ះពាល់ដល់សុខភាព ។ នេះបើតាមការបញ្ជាក់ពី លោក ហេង ប៊ុនគៀត អ្នកជំនាញឱសថ និងជាប្រធាននាយកដ្ឋានឱសថ នៃក្រសួងសុខាភិបាល ។
លោក ហេង ប៊ុនគៀត អ្នកជំនាញឱសថ និងជាប្រធាននាយកដ្ឋានឱសថ នៃក្រសួងសុខាភិបាល បានឲ្យដឹងនៅថ្ងៃទី២០ ខែមីនា ឆ្នាំ២០២០ នេះថា ស្របពេលការកើនឡើង នៃការឆ្លងជំងឺរលាកផ្លូវដង្ហើម ឬ COVID-19 ប្រជាពលរដ្ឋជាច្រើន កំពុង ស្វែងរកជាវនូវម៉ាស និងអាល់កុល ស្ទើរគ្រប់ទីកន្លែង នៅទូទាំងប្រទេសកម្ពុជា ។
ដើម្បីបែងចែកអាល់កុលពិត ឬក្លែងក្លាយ សម្រាប់ប្រជាពលរដ្ឋ មានដូចជា អាល់កុលពិត គឺមានការលក់ នៅតាមឱសថស្ថាន រួមមានទាំងមានការចុះបញ្ជីការ និងចំណុះ នៃប្រភេទ ដែលមានតែ៦ ប្រភេទប៉ុណ្ណោះ។ ចំណែកអាល់កុលក្លែងក្លាយ គឺពុំឆ្លងកាត់ការពិសោធន៍ ឡើយ ជាពិសេសការលក់តាម ប្រព័ន្ធអនឡាញ ជាដើម។ អ្នកជំនាញឱសថ បានបញ្ជាក់ទៀតថា បន្ទាប់ពីករណីវីរុស បានកើតឡើងនៅកម្ពុជា ក្រសួងសុខាភិបាល បានចាត់ វិធានការពិន័យទៅលើម្ចាស់ឱសថស្ថាន ៧កន្លែង ស្ថិតក្រោយវត្តមហាមន្ត្រី ក្នុងសង្កាត់អូឡាំពិក ខណ្ឌចំការមន ដែលលក់ផលិតផលអាល់កុល
ក្លែងក្លាយ។ ប្រជាពលរដ្ឋរស់នៅរាជធានីភ្នំពេញ ភាគច្រើនពុំទាន់ជ្រាបលម្អិតពីវិធីត្រួតពិនិត្យអាល់កុល ថាតើ វាពិត ឬក្លែងក្លាយនោះ តែបានឱ្យដឹងថា ជាទូទៅ អាល់កុល ដែលពួកគេប្រើប្រាស់ គឺទិញមកពីឱសថស្ថាន ឬមន្ទីរពេទ្យ។
បើតាមការឱ្យដឹងរបស់ក្រសួងសុខាភិបាល កាលពីពេលថ្មីៗនេះ អាល់កុល សម្រាប់ប្រើប្រាស់ សម្លាប់មេរោគ គឺជាល្បាយ ដែលមានសារធាតុអេតាណុល លាយជាមួយទឹក ដោយមិនត្រូវមានសារធាតុ ផ្សេងឡើយ ជាពិសេស មេតាណុល ដោយសារសារធាតុនេះ មានមុខងារសម្លាប់មេរោគខ្សោយបំផុត ឬ បណ្តាលឱ្យពុល និងបង្កគ្រោះថ្នាក់ដល់អាយុជីវិត ប្រសិនក្នុងករណីប្រើប្រាស់មិនបានត្រឹមត្រូវ ៕ សហការី
