ក្រុមហ៊ុនចំការកៅស៊ូ ស្វីហ្វរ៉ាប់ប៊ើរ លីមីធីត មិនបើកប្រាក់ឱ្យ២ខែកម្មករប្រមូលគ្នាផ្ទុះការតវានៅសាលាសង្កាត់

ចែករំលែក៖

ខេត្តរតនគិរី ៖ កម្មករក្រុមហ៊ុន ស្វីហ្វរ៉ាប់ប៊ើ លីមីធីត ចំការកៅស៊ូផ្ទុះការតវ៉ាលើកគ្នាមកនៅក្នុងសាលាសង្កាត់កាចាញ ខណៈក្រុមហ៑ុនមួយនេះមិនបើកប្រាក់ខែឱ្យពួកគាត់ចំនួន ២ខែមកហើយ ធ្វើឱ្យគ្មានប្រាក់សំរាប់ផ្គត់ផ្គង់គ្រួសារប្រចាំថ្ងៃ ។
ការប្រមូលផ្តុំគ្នាផ្ទុះការតវារបស់កម្មករនោះនាវេលាម៉ោង៨និង៣០នាទីព្រឹក ថ្ងៃទី១ ខែមេសា ឆ្នាំ២០២០ ក្នុងសាលាសង្កាត់កាចាញ ក្រុងបានលុង ខេត្តរតនគិរី ហើយមានកម្មករប្រមាណជាង៥០នាក់។
ប្រភពបានឱ្យដឹងថា កម្មករមកប្រមូលផ្ដុំគ្នានោះគឺសុំការអន្តរាគមន៍ពីអាជ្ញាធរមូលដ្ឋានក៏ដូចជាមន្ទីរការងារខេត្ត ដើម្បីរកដំណោះស្រាយ គ្រាដែលពួកគាត់មិនមានលុយផ្គត់ផ្គង់គ្រួសារ បន្ទាប់ពីក្រុមហ៊ុនមួយនេះមិនបើកប្រាក់ខែ ២ខែមកហើយ ដោយសន្យាថានិងឱ្យបើកប្រាក់ខែ មុនពេលកំណត់។
កម្មករ បានឱ្យដឹងថា ពួកគាត់ជាកម្មករ ធ្វើការនៅក្រុមហ៊ុន ស្វីហ្ចរ៉ាប់ប៊ើរ លីមីធីត ចំការកៅស៊ូ ដែលមានទីតាំងនៅភូមិ២ សង្កាត់កាចាញ ក្រុងបានលុងខេត្តរតនគិរី។
ហើយក្រុមហ៊ុននេះ តែងតែមានការយឺតយ៉ាវ ក្នុងការបើកប្រាក់ខែជាច្រើនដងមកហើយ។
នេះជាលើកទី៣ ហើយដែលក្រុមហ៊ុននេះមិនបានបើកប្រាក់ខែឱ្យ តាំងពីខែកុម្ភៈ មកម្លេះហើយនៅថ្ងៃទី២៣ ខែមីនា ឆ្នាំ២០២០ ពួកគាត់ក៏បានធ្វើការតវ៉ាម្ដងមកហើយតែខាងក្រុមហ៊ុនបានសន្យាថា នៅថ្ងៃទី៣១ ខែមីនា ឆ្នាំ២០២០នេះ នឹងបើកប្រាក់ខែឱ្យហើយ។
តែផ្ទុយទៅវិញក្រុមហ៊ុនបែជាប្រាប់ថា មិនមានលុយបើកឱ្យនោះទេ ទើបថ្ងៃនេះពួកគាត់លើកគ្នាមកសាលាសង្កាត់ ដើម្បីសុំឱ្យអាជ្ញាធរសង្កាត់ និងមន្ទីរការងារខេត្ត ជួយរកដំណោះស្រាយជូនពួកគាត់តែម្តង។
លោក ថេង ភក្ដី នាយកក្រុមហ៊ុន ស្វីហ្វរ៉ាប់ប៊ើរ លីមីធីត ក៏បានឱ្យដឹងនៅថ្ងៃទី១ ខែមេសានេះថា មិនមែនក្រុមហ៊ុនលោកមួយទេដែលយឺតយ៉ាវ ដោយហេតុថា សាខាធំក្រុមហ៊ុនរបស់លោកនៅ ប៊ែលហ្សិក ហើយក្រុមហ៊ុនលោកជួបបញ្ហាហិរញ្ញវត្ថុ ឥឡូវកៅស៊ូក៏លក់លែងចេញ ដោយសារក្រុមហ៊ុននៅអាហ្វ្រិក ប្រមាណជា២ទៅ៣ ប្រទេសលក់កៅស៊ូលែងចេញ ដូច្នេះមានការយឺតយ៉ាវក្នុងការផ្ទេរប្រាក់ខ្លះអញ្ចឹងហើយ។
ប៉ុន្តែពួកគាត់កំពុងតែរកដំណោះស្រាយ និងរកដៃគូរសហការគឺមិនមែនរកមួយថ្ងៃបាននោះទេ។
លោកថាខាងក្រុមហ៑ុនមិនចង់ឱ្យកម្មករជួបបញ្ហាដូចនេះទេ តែខាងក្រុមហ៊ុនទាល់មែនទែនហើយ ប៉ុន្តែខាងគាត់នៅតែព្យាយាមទាក់ទងគ្នាជាមួយក្រុមហ៊ុនជារៀងរាល់ថ្ងៃ ដើម្បីរកដំណោះស្រាយនូវបញ្ហានេះ។
លោកបន្តថា ចំពោះមុខលោកនៅមិនទាន់ដឹងថា នឹងដោះស្រាយយ៉ាងណានៅឡើយទេ តែលោកកំពុងទាក់ទងទៅមេលោក ដើម្បីធ្វើយ៉ាងណារកដំណោះស្រាយជូនកម្មករឱ្យបាន។
លោក ឌុច ចាន់តូ ប្រធានមន្ទីរការងារខេត្តរតនគិរី បានឱ្យក្រុមអ្នព័ត៌មានដឹងដែរនៅព្រឹកនេាះថា លោកនឹងជួបខាងក្រុមហ៊ុន ពិភាក្សារកដំណោះស្រាយបន្តទៀត ខណៈពេលនេះលោកសុំឱ្យកម្មករទាំងអស់រំសាយសិនទៅ ហើយឱ្យតំណាងកម្មករចំនួន៤នាក់ ព្រមទាំងក្រុមការងារមន្ទីរការងារ ទៅជួបខាងក្រុមហ៊ុន ដើម្បីសម្របសម្រួល ឬ រកដំណោះស្រាយបន្តជូនកម្មករហើយលោកនិងធ្វើរបាយការណ៍ជូនទៅថ្នាក់ខេត្ត និងក្រសួងការងារ។

លោកថា គ្រាន់តែក្រុមហ៊ុន មានការយឺតយ៉ាវ ក្នុងការបើកប្រាក់ខែជូនកម្មករនោះវាខុសបាត់ទៅហើយ ទំរាំដូចជាក្រុមហ៊ុនខាងលើនេះ មិនបើកប្រាក់ខែឱ្យទៀតនោះរហូតដល់ ២ខែទៀត លោកមិនចង់ អនុវត្តតាមតិវិធីនោះទេ ព្រោះខ្លាច បាត់បង់ឆ្នាំងបាយរបស់កម្មកររហូតចំនួន២៨៦នាក់ឯណ្ណោះ។

ទោះជាយ៉ាងណា នេះជាលើកទី៣ ហើយ ដែលក្រុមហ៊ុន ស្វីហ្វរ៉ាប់ប៊ើរ លីមីធីតនេះ មិនបើកប្រាក់ខែឱ្យកម្មករ តាមច្បាប់កំណត់របស់ក្រសួងការងារធ្វើឱ្យកម្មករលើកគ្នាមកតវ៉ាជាច្រើនលើកច្រើនសាមកហើយនោះមិនដឹងលទ្ធផល់មានការវិវឌ្ឍន៍បែបណានោះដែរ៕