បុរសម្នាក់ជូនប្អូនស្រីជីដូនមួយមកផ្ទះជួបគ្រោះថ្នាក់ចរាចរណ៍មានជនសង្ស័យឆ្លៀតឱកាសលួចយកម៉ូតូរគេចខ្លួនបាត់

ភ្នំពេញ ៖ នៅវេលាម៉ោង១០ព្រឹកថ្ងៃទី២២ ខែ ឧសភា ឆ្នាំ ២០២០ បុរសម្នាក់បានមកដាក់ពាក្យបណ្តឹង នៅសង្កាត់ចាក់អង្រែក្រោម ខណ្ឌមានជ័យ ក្រោយពេលជួបគ្រោះថ្នាក់ចរាចរណ៍ហើយមានជនសង្ស័យឆ្លៀតឱកាសលួចយកម៉ូតូគេចខ្លួនទៅបាត់ ។

បើតាមសម្តីជនរងគ្រោះដែលមានឈ្មោះ ប៊ិ សុីល អាយុ ៣២ឆ្នាំ មុខរបរបុគ្គលិកក្រុមហ៊ុនវីង ស្នាក់នៅបន្ទប់ជួលក្នុងក្រុងតាខ្មៅ បានឲ្យដឹងថា មុនកើតហេតុកាលពីម៉ោងប្រហែល១០យប់ថ្ងៃទី២០ ខែ ឧសភា ឆ្នាំ២០២០ គាត់បានបើកម៉ូតូម៉ាកហុងដាស្គូពី ពណ៌ក្រហមពាក់ស្លាកលេខ ភ្នំពេញ1FK-7389 ឌុបប្អូនស្រីជីដូនមួយទៅហូបអីនៅម្ដុំជិតផ្សារតាខ្មៅ រហូតដល់ម៉ោង១រំលងអធ្រាត្រ ចូលថ្ងៃទី២១ ខែឧសភា ទើបជូនប្អូនមកផ្ទះវិញ តែពេលជូនប្អូនដល់ផ្ទះត្រលប់មកវិញស្រាប់តែគាត់បើកម៉ូតូបុកដុំថ្មបណ្តាលឱ្យដួលម៉ូតូតែមិនមានរបួសធ្ងន់ទេ គ្រាន់តែរលាត់ដៃជើងប៉ុណ្ណោះ នៅចំណុចផ្លូវបេតុង ស្ថិតនៅភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ ពេលនោះស្រាប់តែមានជនសង្ស័យ ២នាក់ មកគំរាមមិនឱ្យគាត់ស្រែករួចលើកម៉ូតូគាត់បើករត់គេចខ្លួនបាត់ ។ដោយមិនទាន់បានដាក់ពាក្យបណ្ដឹងភ្លាមទេព្រោះគាត់មិនចាំស្លាកលេខម៉ូតូ កាតគ្រីម៉ូតូទុកក្នុងកែបម៉ូតូជាមួយគ្នារហូតដល់ព្រឹកថ្ងៃទី២២ ខែឧសភា ក៏មានរូបថតម៉ូតូ ពេលខូចចូលជាងក៏មកដាក់ពាក្យបណ្ដឹងឱ្យនគរបាលជួយស្រាវជ្រាវតាមចាប់ជនសង្ស័យយកមកដាក់ទោសទណ្ឌតាមផ្លូវច្បាប់ ។

ប្រជាពលរដ្ឋបានលើកឡើងថា មួយរយៈចុងក្រោយនេះមានករណីលួច និងបន្លំលួចម៉ូតូ២ករណីដោយសារតែមានបើកល្បែងសុីសងខុសច្បាប់ហ្គេមបាញ់ត្រីក្នុងភូមិយួន សង្កាត់ចាក់អង្រែក្រោមនេះ ទោះបីមានការទទូចពីប្រជាពលរដ្ឋមានការរំខានដេកពួនមិនបានព្រោះ តែទីតាំងនេះបើកហ្គេមបាញ់ត្រី២៤ម៉ោង ប្រជាពលរដ្ឋស្នើសុំឱ្យលោក ឌី រ័ត្នខេមរុណ អភិបាលរងខណ្ឌមានជ័យ ជួយអន្តរាគមន៍បង្រ្កាបផង បើមិនដូច្នេះទេច្បាស់ជាកើតចោរកម្ម លួច ឆក់ ប្លន់ ច្រើនមិនខាន៕ជ្រោយពេជ្រ