សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់បានបោកក្បាលនឹងថ្នល់ស្លាប់នៅក្រោមដំណក់ទឹកភ្លៀងយ៉ាងអាណោចអាធ័ម បន្ទាប់ពីដើរឆ្លងផ្លូវត្រូវរថយន្តមិនស្គាល់ម៉ាកបើកបុកពេញទំហឹង រួចព្យាយាមបើករត់បាត់ កាលពីវេលាម៉ោង១១និង២០ នាទីយប់ថ្ងៃទី ២៤ខែមិថុនាឆ្នាំ ២០២០ នៅចំណុចមុខទីបញ្ជាការដ្ឋានកងរាជអាវុធហត្ថលើផ្ទៃប្រទេស តាមបណ្តោយផ្លូវ២៨៩ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។
ជនរងគ្រោះ(ស្លាប់)មិនស្គាល់អត្តសញ្ញាណនោះទេ។
បេីតាមប្រភពព័ត៌មានពីកន្លែងកើតហេតុបានឲ្យដឹងថា ៖ មុនកើតហេតុគេឃើញជនរងគ្រោះធ្វើដំណើរដោយថ្មើរជើងឆ្លងផ្លូវទិសដៅពីកើតទៅលិច លុះមកដល់កន្លែងកើតហេតុខាងលើ បានឆ្លងផ្លូវជិតនឹងផុតទៅហើយក៏មានរថយន្តមួយគ្រឿងមិនចាំម៉ាកធ្វើដំណើរតាមបណ្តោយផ្លូវ២៨៩ ទិសដៅពីត្បូងទៅជើង ក្នុងល្បឿនលឿនបានបុកជនរងគ្រោះពេញទំហឹងបណ្តោយឲ្យដួលបោកក្បាលនឹងថ្នល់ស្លាប់ភ្លាមៗនៅក្រោមដំណក់ទឹកភ្លៀងយ៉ាងអាណោចអាធ័ម។
ចំណែករថយន្តបង្កមិនបានឈប់ទទួលខុសត្រូវនោះទេ ហេីយបើករត់ចេញពីកន្លែងកើតហេតុបាត់ស្រមោល។
ក្រោយកើតហេតុ សមត្ថកិច្ចមូលដ្ឋានបានចុះមកដល់ហេីយទំនាក់ទំនងទៅមន្ត្រីជំនាញចុះមកធ្វើកំណត់ហេតុរួចដឹកសពតាមរថយន្តទៅតម្កល់ទុកនៅវត្តទឹកថ្លារងចាំធ្វើការទាក់ទងរកសាច់ញាតិមកទទួលយកទៅធ្វើបុណ្យតាមប្រពៃណី៕
ដោយ៖សុខា សែនជ័យ
