សារព័ត៌មាន នគរវត្ត តែងតែនាំមុខគេជានិច្ច
ប្រទេសប្រេសុីល៖ សមាគមសារព័ត៌មានប្រេស៊ីល (ABI) បានប្រកាសឲ្យដឹងថា ខ្លួនបានដាក់ពាក្យបណ្តឹង ប្តឹងប្រធានាធិបតីJair Bolsonaro ឡើងទៅកាន់តុលាការជាន់ខ្ពស់ប្រេស៊ីល ពីបទមានចេតនាចម្លងកូវីដ-១៩ ទៅឲ្យបុគ្គលិកផ្សេងទៀត ដោយសារតែការមិនពាក់ម៉ាស់ ទោះបីដឹងថាខ្លួនផ្ទុកកូវីដ-១៩ក៏ដោយ។
សមាគមសារព័ត៌មានបានចោទប្រកាន់ប្រធានាធិបតីJair Bolsonaro ថាមិនគោរពច្បាប់ សុវត្ថិភាព និងការពារសុខភាពដល់ក្រុមអ្នកសារព័ត៌មាន ដោយដោះម៉ាស់ចេញក្នុងពេលធ្វើសន្និសីទកាសែត ក្នុងទីក្រុង Brasília កាលពីថ្ងៃទី៧ ខែកក្កដាកន្លងទៅ ជាពេលវេលាដែលលោកប្រកាសថា ខ្លួនវិជ្ជមានចំពោះកូវីដ-១៩។
សមាគមសារព័ត៌មានប្រេស៊ីល (ABI) បានចោទប្រកាន់ប្រធានាធិបតីបង្កគ្រោះថ្នាក់ដល់អាយុជីវិតអ្នកសារព័ត៌មាននៅក្នុងសន្និសីទកាសែត។ ក្រោយសន្និសីទកាសែតតំណាងរាស្ត្រMarcelo Freixo បានបង្ហោះសារនៅលើបណ្តាញសង្គមថា លោកបានដាក់ពាក្យ បណ្តឹងប្តឹងប្រធានាធិបតីដែលបានបំពានច្បាប់ មាត្រា១៣១ និង១៣២ នៃច្បាប់ព្រហ្មទណ្ឌ ដែលដោះម៉ាស់ចេញនៅក្នុងពេលធ្វើសន្និសីទកាសែត។
នៅពេលនេះបណ្តារដ្ឋមន្ត្រីទាំងអស់ និងអ្នកធ្វើការជិតស្និទ្ធជាមួយប្រធានាធិបតី ត្រូវបានធ្វើតេស្ត ស្វែងរកកូវីដ-១៩ ក្រោយពីប្រធានាធិបតីបានឆ្លង។ បច្ចុប្បន្នប្រេស៊ីល មានករណីឆ្លងកូវីដ-១៩កើនឡើងជាង១,៧លាននាក់និងស្លាប់៦៨ពាន់នាក់ ឈរលំដាប់ទីពីរបន្ទាប់ពីអាមេរិក៕ដោយ៖ធី រីណា
