សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យ នៃអគ្គស្នងការដ្ឋាននគរបាលជាតិ នៅថ្ងៃទី៣០ ខែកក្កដាឆ្នាំ២០២០នេះ បានបញ្ជាក់ថា នគរបាលចរាចរណ៍ទូទាំងប្រទេសកម្ពុជាបានត្រួតពិនិត្យ និងផាកពិន័យលើយានយន្តសរុបចំនួន១,១៣៧គ្រឿងទៀតក្នុងនោះមានម៉ូតូ ៨៣១គ្រឿង និងរថយន្ត ៣០៦គ្រឿង។
អ្នកនាំពាក្យរូបនេះបន្តថា រយៈពេល៩១ថ្ងៃ នៃការរឹតបន្ដឹងច្បាប់ចរាចរណ៍ផ្លូវគោក ដោយបង្កើនប្រាក់ពិន័យ តាមអនុក្រឹត្យលេខ៣៩ ពោលគឺថ្ងៃទី០១ខែឧសភា ដល់ថ្ងៃទី៣០ ខែកក្កដា ឆ្នាំ២០២០ នគរបាលចរាចរណ៍ទូទាំងប្រទេស បានត្រួតពិនិត្យ និងផាកពិន័យយានយន្តសរុបចំនួន១២៤,៥១៦គ្រឿង ក្នុងនោះមានម៉ូតូ ៩២,២៨៧គ្រឿង និងរថយន្តគ្រប់ប្រភេទ ៣២,២២៩គ្រឿង។
ឧត្តមសេនីយ៍ឯក ឆាយ គឹមខឿន បានបញ្ជាក់ថា រយៈពេល៩១ថ្ងៃមកនេះការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ។ លោកបានថ្លែងអំណរគុណ និងកោតសរសើរដល់ជនរួមជាតិ ជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើរ រយៈពេលកន្លងមកនេះ ជាពិសេសកោតសរសើរនិងអរគុណ ដល់នគរបាលចរាចរណ៍ ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ ប្រកបដោយស្មារតីទទួលខុសត្រូវខ្ពស់បំផុត។
គួរបញ្ជាក់ថា បទល្មើសដែលត្រូវបានកត់សម្គាល់សម្រាប់ម៉ូតូ គឺភាគច្រើនអត់មួក ល្មើសសញ្ញា អត់ស្លាកលេខ និងប្រើប្រាស់ទូរស័ព្ទដៃ។ដោយឡែកបទល្មើសសម្រាប់រថយន្ត គឺភាគច្រើនលើសល្បឿន លើសចំណុះ អត់ខ្សែក្រវាត់ ល្មើសសញ្ញា អត់ស្លាកលេខ ដឹកលើសទម្ងន់ប្រើប្រាស់ទូរស័ព្ទជាដើម។
ដោយឡែកសម្រាប់ថ្ងៃទី៣០ ខែកក្កដា ឆ្នាំ២០២០នេះដែរ បទល្មើសចរាចរណ៍ នៅទូទាំងប្រទេសកម្ពុជា ក៏បានកើតឡើងចំនួន ០៨លើក ក្នុងនោះស្លាប់ ០២នាក់ របួស ១១នាក់ (របួសធ្ងន់ ០៨នាក់)៕ដោយ៖ស តារា
