សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ បេីតាមការបញ្ជាក់ពីលោក ប៉ាន់ យ៉ន គណៈកម្មការសហគមន៍បឹងស្នេហ៍ធាយ និងជាអនុប្រធានសហគមន៍ព្រៃទួលព័ន្ធតាឡី បានថ្លែងឲ្យដឹងកាលពីរសៀលថ្ងៃទី៦ ខែមេសា ឆ្នាំ២០២១ថា៖ ករណីសត្វស្លាបនៅតំបន់អភិរក្សទួលព័ន្ធតាឡីបឹងស្នេហ៍ ស្ថិតក្នុងឃុំធាយ ស្រុកបាភ្នំ ខេត្តព្រៃវែង នៅតែបន្តងាប់រាប់ពាន់ក្បាល។ នេះបើគិតចាប់ពីថ្ងៃទី១៧ ខែមីនា ដល់ថ្ងៃទី៦ ខែមេសា ឆ្នាំ២០២១ម្សិលមិញនេះ។
លោក ប៉ាន់ យ៉ន បានបញ្ជាក់បន្ថែមថា ចំពោះសត្វស្លាបដែលបានងាប់ជាបន្តបន្ទាប់កន្លងមកនេះ បើតាមការយកសំណាកសត្វស្លាបទៅពិនិត្យ ផ្អែកលើលទ្ធផលវិភាគលេខ១១/២១ វ.ជ.ស.ស.ជ ចុះថ្ងៃទី២២ ខែមីនា ឆ្នាំ២០២១ របស់វិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានបង្ហាញឲ្យឃេីញថា មានវត្តមានវីរុសជំងឺផ្កាសាយបក្សី ដែលបង្កដោយវីរុសក្នុងអនុក្រុម A/H5N1។
លេីសពីនេះ អនុប្រធានសហគមន៍ព្រៃទួលព័ន្ធតាឡីរូបនេះ ថ្លែងបន្តថា កាលពីមុនសត្វស្លាបនៅទួលព័ន្ធតាឡីនេះ ក្នុង១ថ្ងៃមានងាប់ចាប់ពី១៤៥ក្បាល ទៅ១៥០ក្បាល រហូតដល់១៧៥ក្បាលឯណោះ។ ប៉ុន្តែរយៈពេល២ថ្ងៃចុងក្រោយនេះ សត្វងាប់ថយចុះ ដោយកាលពីថ្ងៃទី៥ ខែមេសាថ្មីៗនេះ សត្វងាប់ត្រឹមតែ ៣៥ក្បាល នឹងថ្ងៃទី៦ ខែមេសា មានងាប់៥៧ក្បាលប៉ុណ្ណោះ ខណៈមិនគិតពីចំនួនសត្វងាប់នៅក្នុងព្រៃជ្រៅ ដែលមិនបានចូលទៅរើសផង។
ដោយឡែកដើម្បីទប់ស្កាត់កុំឲ្យមានសត្វងាប់បន្តទៀត អាជ្ញាធរឃុំ ស្រុក ខេត្ត ក្រសួងមន្ត្រីជំនាញពាក់ព័ន្ធ បាននិងកំពុងសហការគ្នាបាញ់ទឹកដាក់ និងបាញ់ថ្នាំសម្លា.ប់មេរោគនៅតំបន់នេះពេញព្រៃ និងយកសំណាកសត្វងា.ប់ទៅពិនិត្យជាប្រចាំបន្តទៀតផងដែរ។ តែសម្រាប់ការពិនិត្យសំណាកសត្វរបស់មន្ត្រីពេទ្យជំនាញ រហូតមកដល់ថ្ងៃនេះ មិនមានរកឃើញជំងឺអ្វីផ្សេងក្រៅពីជំងឺវីរុសផ្កាសាយបក្សី H5N1នោះទេ។
លោកអនុប្រធានសហគមន៍ បានបន្តទៀតថា ដើម្បីចូលរួមទប់ស្កាត់ការឆ្លងរាលដាលជំងឺឆ្លងសត្វ អាជ្ញាធរបានចាត់វិធានការដូចខាងក្រោម ៖
១- បំផ្លាញចោលចំពោះបក្សីដែលសង្ស័យមានជំងឺ សាកស.ពបក្សី និងផលិតផលបក្សីក្នុងតំបន់ផ្ទុះជំងឺតាមវិធានបច្ចេកទេសបសុពេទ្យ។
២- ផ្អាកជាបណ្តោះអាសន្នលើការចូល-ចេញ ឬឆ្លងកាតក្នុងរង្វង់កាំប្រវែង៣គីឡូម៉ែត្រ ពីចំណុចផ្ចិតនៃតំបន់ផ្ទុះជំងឺ និងដាក់តំបន់នេះ ជាតំបន់ត្រួតពិនិត្យ និងតាមដាន។
៣- សិក្សាស្រាវជ្រាវប្រភពជំងឺផ្កាសាយបក្សីក្នុងរៈ:ពេល៣០ថ្ងៃ និងត្រួតពិនិត្យឃ្លាំមើលចលនាបក្សីជាប្រចាំក្នុងរង្វង់ដែលមានកាំប្រវែង១០គីឡូម៉ែត្រ ពីចំណុចផ្ចិត នៃតំបន់ផ្ទុះជំងឺ។
៤- ត្រូវរាយការណ៍ពីកន្លែងបក្សីងា.ប់ដល់មន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ដើម្បីអនុវត្តវិធានការបច្ចេកទេសបសុពេទ្យ។
គួរបញ្ជាក់ថា ជុំវិញបញ្ហានេះដែរ រដ្ឋបាលខេត្តព្រៃវែង កាលពីពេលកន្លងទៅថ្មីៗនេះ ក៏បានចេញសេចក្តីជូនដំណឹងមួយជូនដល់បងប្អូនប្រជាពលរដ្ឋក្នុងខេត្តព្រៃវែង និងសាធារណជនឱ្យចូលរួមក្នុងការការពារសត្វស្លាបដែលកំពុងអភិរក្ស និងដើម្បីបង្ការការឆ្លងជំងឺផ្សេងៗដែលកើតមានជាយថាហេតុ ក្នុងករណីសត្វស្លាបងាប់ជាបន្តបន្ទាប់រៀងរាល់ថ្ងៃ ហើយមានចំនួនច្រើន។
ដូច្នេះរដ្ឋបាលខេត្ត សូមផ្សព្វផ្សាយ និងហាមឃាត់ដាច់ខាតកុំប៉ះពាល់ ឬបរិភោគ ត្រូវដុតបំផ្លាញចោលក្នុងករណីឃើញសត្វស្លាបងាប់ដូចជា៖ សត្វននៀលខ្យង សត្វត្រយងខ្លួនរលោង សត្វខ្វែក សត្វកុកគ្រោង សត្វក្អែក និងសត្វស្លាបមួយចំនួនទៀត៕
ដោយ៖សហការី
