សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ នៅព្រឹកថ្ងៃសៅរ៍ ទី២៦ ខែមិថុនា ឆ្នាំ២០២១នេះ ទីភ្នាក់ងារសារព័ត៌មាន Reuters បានដកស្រង់ចេញផ្សាយពីនិយតករឱសថអាមេរិក នៅថ្ងៃសុក្រម្សិលមិញនេះ បានបន្ថែមការព្រមានមួយទៀត អំពីបញ្ហារលាកបេះដូង (heart inflammation) ដ៏កម្រលើអ្នកដែលបានចាក់វ៉ាក់សាំងបង្ការជំងឺ COVID-19 របស់ក្រុមហ៊ុនអាមេរិក-អាល្លឺម៉ង Pfizer-BioNTech និងក្រុមហ៊ុនអាមេរិក Moderna។
ជាក់ស្ដែងបើតាមរដ្ឋបាលចំណីអាហារ និងឱសថអាមេរិក (FDA) បានគូសបញ្ជាក់យ៉ាងដូច្នេះថា៖ វ៉ាក់សាំងនីមួយៗអាចបង្កឲ្យមាន “ហានិភ័យ” ដូចជា៖ ការរលាកសាច់ដុំបេះដូង និងជំងឺរលាកស្រោមបេះដូង ជាពិសេសក្រោយពេលចាក់វ៉ាក់សាំងដូសទី ២ ដោយចាប់ផ្តើមចេញរោគសញ្ញាក្នុងរយៈពេល ០២ ទៅ ០៣ថ្ងៃក្រោយការចាក់វ៉ាក់សាំង។
សូមជម្រាបថា មានករណីរលាកសាច់ដុំបេះដូង និងរលាកស្រោមបេះដូងច្រើនជាង ១,២០០ករណីត្រូវបានគេរាយការណ៍ទៅកាន់ បណ្តាញអ្នករាយការណ៍រោគសញ្ញា នៃការចាក់វ៉ាក់សាំងអាមេរិក (VAERS) ក្នុងចំណោមវ៉ាក់សាំងដែលត្រូវបានអភិវឌ្ឍឡើង ដោយប្រើប្រាស់បច្ចេកវិទ្យា mRNA ប្រហែល ៣០០លានដូស។នេះបេីគិតត្រឹមថ្ងៃទី១១ ខែមិថុនា ឆ្នាំ២០២១កន្លងទៅថ្មីៗនេះ។ ចំពោះករណីទាំងនេះដែរ គឺមានអត្រាខ្ពស់ចំពោះបុរស និងក្នុងមួយសប្តាហ៍ បន្ទាប់ពីការចាក់វ៉ាក់សាំងដូសទី ២។
ជាមួយគ្នានេះ មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) ក៏បានកំណត់អត្តសញ្ញាណអ្នកជំងឺរលាកបេះដូង ដែលបានចូលសម្រាកព្យាបាលនៅមន្ទីរពេទ្យចំនួន ៣០៩នាក់ ដែលពួកគេមានអាយុក្រោម ៣០ឆ្នាំដែលក្នុងនោះមាន ២៩៥នាក់ ត្រូវបានអនុញ្ញាតឱ្យចាកចេញពីមន្ទីរពេទ្យហើយ ក្រោយជាសះស្បើយ។
ដោយឡែកជុំវិញបញ្ហានេះ ក្រុមហ៊ុន Pfizer និង Moderna មិនបានឆ្លើយតបភ្លាមៗ ចំពោះសំណើសុំធ្វើការអត្ថាធិប្បាយនៅឡើយទេ។
គួរបញ្ជាក់ថា និយតករឱសថនៅក្នុងប្រទេសជាច្រើន បាននិងកំពុងស៊ើបអង្កេតលើ “ករណីរលាកសាច់ដុំបេះដូង” និង “រលាកស្រោមបេះដូង” ដែលត្រូវបានរកឃើញញឹកញាប់លើបុរស បន្ទាប់ពីការចាក់វ៉ាក់សាំងរបស់ក្រុមហ៊ុន Pfizer ឬ Moderna ដែលអភិវឌ្ឍឡើងដោយប្រើប្រាស់បច្ចេកវិទ្យា mRNA នេះ៕
ដោយ៖ស តារា
