សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ ជនសង្ស័យ៣នាក់ ត្រូវបានសមត្ថកិច្ចចាប់ឃាត់ខ្លួននៅក្នុងវង់ល្បែងបញ្ជល់មាន់ ចំណុចព្រៃត្រពាំងអញ្ជាញ ស្ថិតនៅ ភូមិសុវណ្ណគមន៍ ឃុំកណ្តោលជ្រុំ ស្រុកពញាក្រែក ។
អ្នកទាំង៣នាក់ត្រឹមអប់រំណែនាំបញ្ឈប់លេងល្បែងស៊ីសងនេះទៀត រួចឲ្យវិលត្រឡប់ទៅមូលដ្ឋានវិញ ។
ជនសង្ស័យទាំង៣នាក់ត្រូវបានចាប់ ឃាត់ខ្លួនដោយកម្លាំងជំនាញ នៃអធិការដ្ឋានស្រុកពញាក្រែក នៅថ្ងៃអង្គារ ៣ រោច ខែទុតិយាសាឍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២៧ ខែកក្កដា ឆ្នាំ២០២១ នៅចំណុចព្រៃ ត្រពាំងអញ្ជាញ ស្ថិតនៅ ភូមិសុវណ្ណគមន៍ ឃុំកណ្តោលជ្រុំ ស្រុកពញាក្រែក ។
ជនសង្ស័យចំនួន ០៣នាក់មាន ៖
១.ឈ្មោះ តែ ហ៊ាន ភេទប្រុស អាយុ ៥៥ឆ្នាំ រស់នៅភូមិវាល ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ។
២.ឈ្មោះ អ៊ាត សុខុម ភេទប្រុស អាយុ ៣៨ឆ្នាំ ជាតិខ្មែរ នៅភូមិកណ្ដោលជ្រុំ ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ។
៣.ឈ្មោះ តាំង សុងលី ភេទប្រុស អាយុ ៦២ឆ្នាំ ជាតិខ្មែរ នៅភូមិសុវណ្ណគមន៍ ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ។
រួមនិង បក្សពួកមួយចំនួនទៀត រត់គេចខ្លួនបាត់ បានបន្សល់ទុកនូវវត្ថុតាងមួយចំនូន នៅកន្លែងបញ្ជល់មាន់មាន៖ ម៉ូតូចំនួន ១០គ្រឿង មាន់ចំនួន ០៥ក្បាល ជញ្ជីងសម្រាប់ថ្លឹងមាន់ចំនួន ០១ គ្រឿង ។
ករណីនេះ សមត្ថកិច្ចបានអនុវត្តតាមនីតិវិធីដោយសម្រេចឲ្យជនសង្ស័យទាំង ០៣នាក់ត្រឹមធ្វើកិច្ចសន្យា និង អប់រំណែនាំបញ្ឈប់ប្រព្រឹត្តល្បែងស៊ីសង រួចឲ្យវិលត្រឡប់ទៅមូលដ្ឋានវិញ ៕
ដោយ ៖ វណ្ណៈ
