សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ក្រោមការដឹកនាំបញ្ជាពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបចំពោះគណនីហ្វេសប៊ុកសុំមិនបញ្ចេញឈ្មោះដែលបានរាយការណ៍ក្នុងប្រអប់សារផេកហ្វេសប៊ុកស្នងការដ្ឋាននគរបាលខេត្តកណ្ដាល មានខ្លឹមសារថា «ជម្រាបសួរលោកពូស្នងការ នៅក្បែរផ្ទះខ្ញុំចាក់ធុងបាស់ឮៗ ហើយគាត់ចាក់ធុងបាស់នេះស្ទើរតែរាល់ថ្ងៃ ហើយបើកឮៗ មិនគិតដល់អ្នកជិតខាងសោះ គាត់ចាក់ធុងបាស់នេះពេលល្ងាចឮខ្លាំងៗ។
សូមលោកពូស្នងការជួយកុំឱ្យគាត់ចាក់ទៀតអី ស្ថិតនៅភូមិពុកឫស្សីលើ ឃុំពុកឫស្សី ស្រុកខ្សាច់កណ្ដាល ខេត្ដកណ្តាល ផ្ទះអ្នកចាក់ធុងបាស់ឈ្មោះអ្នកគ្រូវ៉ាន់នី គាត់ជាគ្រូបង្រៀន សូមអរគុណ»។
ក្រោយពីទទួលបានព័ត៌មានខាងលើ ដោយបានការចង្អុលបង្ហាញពីក្រុមការងារព័ត៌មាននិងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល លោកអធិការ នៃអធិការដ្ឋាននគរបាលស្រុកខ្សាច់កណ្តាល បានបញ្ជាកម្លាំងប៉ុស្តិ៍នគរបាលរដ្ឋបាលពុកឫស្សី ចុះស្រាវជ្រាវករណីខាងលើ ។
ជាលទ្ធផល៖ នៅថ្ងៃសុក្រ ១២កើត ខែស្រាពណ៍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២០ ខែសីហា ឆ្នាំ២០២១ វេលាម៉ោង១៣៖០០នាទី រសៀល កម្លាំងប៉ុស្តិ៍ពុកឫស្សីបានចុះទៅដល់ផ្ទះអ្នកគ្រូ វ៉ាន់នី និងប្តីឈ្មោះ សុង សុផុន នៅភូមិពុកឫស្សីលើ ឃុំពុកឫស្សី ស្រុកខ្សាច់កណ្តាល ហើយបានសួរនាំម្ចាស់ផ្ទះបានប្រាប់សមត្ថកិច្ចថា៖ គាត់ចាក់ធុងបាស់មិនមែនរាល់ថ្ងៃទេ ចាក់តែពេលព្រឹក និងពេលល្ងាចមួយភ្លែតៗទេ តែចាក់រៀងឮៗមែន។
បន្ទាប់មកកម្លាំងប៉ុស្តិ៍ពុកឫស្សី បានធ្វើការណែនាំ និងឱ្យម្ចាស់ផ្ទះធ្វើកិច្ចសន្យាពេលចាក់ធុងបាស់ត្រូវបើកសំឡេងឮល្មមៗអាចស្តាប់បាន ហាមបើកឮៗ និងចាក់ត្រូវមានពេលវេលាកំណត់ ដើម្បីកុំប៉ះពាល់ដល់សិទ្ធិអ្នកជិតខាង ចាប់ពីថ្ងៃធ្វើកិច្ចសន្យានេះតទៅ។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គមមេត្តាជ្រាបជាព័ត៌មាន៕
ដោយ៖សហការី
