សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ម៉ូតូមួយគ្រឿងរបស់ក្រុមហ៊ុនដឹកជញ្ជូនបានបើកបត់ឆ្វេងខ្វះការប្រុងប្រយ័ត្នបណ្តាលឲ្យម៉ូតូក្រុមហ៊ុនដឹកជញ្ជូនមួយគ្រឿងទៀតជ្រុលល្បឿនទៅបុកពេញទំហឹងធ្វើឱ្យរងរបួសធ្ងន់និងស្រាលត្រូវបានបញ្ជូនទៅព្យាបាលនៅមន្ទីរពេទ្យភ្លាមៗ។
ហេតុការណ៍នេះបានកើតឡើងកាលពីវេលាម៉ោង ១១ ព្រឹកថ្ងៃទី១៤ ខែកញ្ញា ឆ្នាំ២០២១ ស្ថិតនៅតាមបណ្តោយផ្លូវR8 ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
តាមប្រភពព័ត៌មាននៅកន្លែងកើតហេតុបានប្រាប់ឱ្យដឹងថា មុនពេលកើតហេតុ គេបានឃើញម៉ូតូដឹកជញ្ជូនរបស់ក្រុមហ៊ុន nham24.com ម៉ាកឌ្រីម C125 ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ 1IC-2609 បើកតាមបណ្តោយផ្លូវR8 ក្នុងទិសដៅពីត្បូងទៅជើងដោយប្រើល្បឿនលឿន ខណៈមកដល់ចំណុចផ្លូវR8 កែងផ្លូវបេតុង ដែលជាកន្លែងកើតហេតុគាត់ក៏បានបត់ឆ្វេង ហើយពេលកំពុងបត់ស្រាប់តែមានម៉ូតូក្រុមហ៊ុនដឹកជញ្ជូនមួយគ្រឿងទៀត (មិនបញ្ជាក់ឈ្មោះក្រុមហ៊ុន) ម៉ាក SUZUKI let’s ពណ៌ទឹកប្រាក់ ពាក់ស្លាកលេខ ព្រៃវែង 1P-4812 បើកដោយបុរសម្នាក់តាមបណ្តោយផ្លូវR8 ក្នុងទិសដៅពីជើងទៅត្បូង ឆ្ពោះទៅមុខត្រង់ បានជ្រុលល្បឿនមកបុកគ្នាពេញទំហឹង បណ្តាលឱ្យរងរបួសធ្ងន់និងស្រាលត្រូវបញ្ជូនទៅកាន់មន្ទីរពេទ្យភ្លាមៗ។
ក្រោយពេលកើតហេតុ កម្លាំងសមត្ថកិច្ចមូលដ្ឋាន រួមជាមួយកម្លាំងសមត្ថកិច្ចជំនាញ បានចុះមកដល់ចំណុចកើតហេតុ រួចធ្វើការវាស់វែងយកម៉ូតូទាំង២គ្រឿង ទៅការិយាល័យចរាចរណ៍ផ្លូវគោករង់ចាំការដោះស្រាយគ្នានៅពេលក្រោយ៕
ដោយ ៖ រ៉ារ៉ា
