សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលបានឃាត់ខ្លួនជនសង្ស័យម្នាក់បន្ទាប់ពីបានប្រើហឹង្សាយកដាវកាប់ទៅលើឪពុកម្ដាយបណ្ដាលឱ្យរងរបួស មូលហេតុចូលទៅឃាត់កុំឱ្យឈ្លោះជាប្រពន្ធ។
ហេតុការណ៍នេះបានកើតឡើងកាលពីវេលាម៉ោង១១និង២០នាទីយប់ថ្ងៃ ទី២៤ ខែកញ្ញា ឆ្នាំ២០២១ ស្ថិតក្នុងភូមិទាហានក្រោម សង្កាត់ស្វាយតឿ ក្រុងស្វាយរៀង។
សមត្ថកិច្ចនគរបាលបានឲ្យដឹងថាបុរសជាជនសង្ស័យមានឈ្មោះ ទេព ឆើត អាយុ ៣៣ឆ្នាំ មុខរបរ កម្មកររោងចក្រ រស់នៅភូមិ ទាហានក្រោម សង្កាត់ស្វាយតឿ ក្រុងស្វាយរៀង ។
ចំណែកឪពុកអ្នករងរបួសមានឈ្មោះ ទេព ឈីន អាយុ ៥៣ឆ្នាំ មុខរបរ អនុភូមិទាហានក្រោម រស់នៅភូមិជាមួយគ្នា ត្រូវមួយដាវចំក្រោមគុម្ពត្រចៀកខាងឆ្វេង រងរបួសស្រាល និងម្ដាយ ឈ្មោះ សូ យិន អាយុ៥០ឆ្នាំមុខរបរ មេផ្ទះ រស់នៅភូមិឃុំជាមួយគ្នារងរបួស ត្រូវចំកដៃខាងស្ដាំ រងរបួសស្រាល ។
តាមសាក្សីបានឱ្យដឹងថាមុនកើតហេតុបុរសឈ្មោះទេព ឆើត បានផឹកស្រាឡើងស្រវឹងហើយក៏មានជម្លោះជាមួយប្រពន្ធយ៉ាងខ្លាំងក្រោយមកឪពុកម្ដាយឃើញសភាពបែបនេះក៏ចូលទៅឃាត់កុំឱ្យឈ្លោះគ្នាព្រោះយប់ងងឹតហើយខ្លាចផ្អើលអ្នកភូមិ។
ប្រភពបន្តថាបន្ទាប់មកស្រាប់តែជនសង្ស័យបានយកដាវកាប់ទៅលើឪពុកម្ដាយបណ្ដាលឱ្យរងរបួសបង្កការភ្ញាក់ផ្អើលដល់អ្នកភូមិនិងសមត្ថកិច្ចមកអន្តរាគមន៍ឃាត់ខ្លួនមកសាកសួរតែម្ដង។
ជនសង្ស័យត្រូវបានសមត្ថកិច្ចឃាត់ខ្លួនបញ្ជូនមកអធិការដ្ឋាននគរបាលក្រុងស្វាយរៀងដើម្បីចាត់ការបន្តតាមច្បាប់ ៕
ដោយ៖យឹម សុថាន
