សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅថ្ងៃអង្គារ ០១រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវថ្ងៃទី១៨ ខែមករា ឆ្នាំ២០២២ នៅទីស្ដីការក្រសួង លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានជួបសម្តែងការគួរសម និងពិភាក្សាការងារជាមួយលោក Lim Jock Hoi អគ្គលេខាធិការអាស៊ាន និងគណៈប្រតិភូ ដោយមានការអញ្ជើញចូលរួមពីថ្នាក់ដឹកនាំក្រសួងទទួលបន្ទុក និងមន្ត្រីជំនាញក្រោមឱវាទផងដែរ។
ថ្លែងក្នុងជំនួបនេះ លោកទេសរដ្ឋមន្ត្រី បានគូសបញ្ជាក់ពីអាទិភាពនៃការកសាង និងអភិវឌ្ឍហេដ្ឋារចនាសម្ព័ន្ធរូបវន្តរបស់រាជរដ្ឋាភិបាលក្រោមដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានវាយតម្លៃខ្ពស់ចំពោះសារសំខាន់នៃវិស័យអាទិភាពទាំងបួនរួមមាន៖ ទឹក អគ្គិសនី ផ្លូវ និងធនធានមនុស្សដើម្បីកសាង និងអភិវឌ្ឍប្រទេសកម្ពុជាឱ្យមានការរីកចម្រើន។
ជាមួយគ្នានោះផងដែរ លោកទេសរដ្ឋមន្ត្រី បានជម្រាបជូនភ្ញៀវអំពីសមិទ្ធផលសម្រេចបានដ៏ធំធេង របស់កម្ពុជាក្នុងរយៈពេល២០ឆ្នាំកន្លងទៅ ដោយក្នុងនោះ៖ ដំណាក់កាលទី១ កម្ពុជាចាប់ផ្តើមកសាងបណ្ដាញផ្លូវថ្នល់ដោយចាក់កៅស៊ូពីរស្រទាប់ស្តើង (DBST) ដើម្បីតភ្ជាប់ទៅគ្រប់ច្រកល្ហកពីរាជធានីភ្នំពេញទៅកាន់បណ្តាខេត្តនានាទូទាំងប្រទេស ហើយបច្ចុប្បន្នបានឈានដល់ដំណាក់កាលទី២ ដែលជាដំណាក់កាលត្រូវលើកកម្ពស់គុណភាពផ្លូវពីផ្លូវចាក់កៅស៊ូពីរស្រទាប់ស្ដើងទៅជាផ្លូវបេតុងកៅស៊ូ (AC) និងពង្រីកផ្លូវពីពីរគន្លង ទៅបួនគន្លងសម្រាប់ផ្លូវជាតិសំខាន់ៗ ដើម្បីឱ្យសមស្របទៅនឹងការរីកចម្រើនសេដ្ឋកិច្ច និងកំណើនយានយន្ត។
ជាងនេះទៅទៀត លោកទេសរដ្ឋមន្ត្រី បានជម្រាបផងដែរអំពីគម្រោងសាងសង់ផ្លូវល្បឿនលឿនតភ្ជាប់ភ្នំពេញទៅក្រុងព្រះសីហនុ ដែលគ្រោងនឹងបញ្ចប់នៅខែកញ្ញា ឆ្នាំ២០២២ គម្រោងលើកកម្ពស់កម្រិតគុណភាពផ្លូវជាតិលេខ៤ក្រោមហិរញ្ញប្បទានពីធនាគារពិភពលោក ការតភ្ជាប់ផ្លូវដែកឡើងវិញរវាងកម្ពុជា និងថៃដែលត្រូវបានបំផ្លិចបំផ្លាញដោយសង្គ្រាម គម្រោងធ្វើឱ្យប្រសើរឡើងកំពង់ផែក្រុងព្រះសីហនុ ការបញ្ចប់ផែនការមេភស្តុភាកម្ម ការសិក្សាគម្រោងសាងសង់មជ្ឈមណ្ឌលភស្តុភាកម្មភ្នំពេញ ការសិក្សាគម្រោងសាងសង់មជ្ឍមណ្ឌលភស្តុភារកម្មក្រុងព្រះសីហនុ ដើម្បីកាត់បន្ថយការចំណាយលើថ្លៃដឹកជញ្ជូនសម្រាប់កម្ពុជា និងតំបន់ គម្រោងពង្រីក និងលើកកម្រិតគុណភាពផ្លូវពីកៅស៊ូពីរស្រទាប់ស្តើងទៅបេតុង កៅស៊ូ(AC)ធ្វើឱ្យប្រសើរឡើងផ្លូវពីខេត្តសៀមរាបទៅកាន់ស្រុកបានលុង ខេត្ដរតនគីរី និងទៅកាន់អូរយ៉ាដាវ។
លោកទេសរដ្ឋមន្ត្រី បានលើកឡើងផងដែរអំពីការជំរុញការអនុវត្តផែនការយានយន្តដើរដោយថាមពលអគ្គិសនីនៅក្នុងឆ្នាំនេះ ដើម្បីចូលរួមចំណែកកាត់បន្ថយផលប៉ះពាល់ផលបរិស្ថាន ដែលក្នុងនោះ៖ ក្រសួងកំពុងសហការជាមួយកម្មវិធីអភិវឌ្ឍន៍អង្គការសហប្រជាជាតិ(UNDP) ដើម្បីដំឡើងស្ថានីយសាកអាគុយចំនួនប្រាំកន្លែង រួមមាន៖ ទីស្តីការក្រសួងសាធារណការ និងដឹកជញ្ជូន ក្រុងព្រះសីហនុ ខេត្តបាត់ដំបង និងរាជធានី-ខេត្តមួយចំនួន និងកំពុងសហការជាមួយដៃគូឯកជន ដើម្បីអភិវឌ្ឍហេដ្ឋារចនាសម្ព័ន្ធសម្រាប់យានយន្តដើរដោយថាមពលអគ្គិសនី។ បន្ថែមពីលើនេះ ក្រសួងនឹងបញ្ជាទិញរថយន្តដើរដោយថាមពលអគ្គិសនីមួយចំនួន ដើម្បីប្រើប្រាស់ក្នុងការចុះត្រួតពិនិត្យផ្លូវផងដែរ ដើម្បីជាការចាប់ផ្ដើមជំហានដំបូង ក៏ដូចជាលើកទឹកចិត្តដល់សាធារណជនឱ្យប្រើប្រាស់យានយន្តដើរដោយថាមពលអគ្គិសនីនេះ។
ទាក់ទងនឹងការដឹកជញ្ជូន លោកទេសរដ្ឋមន្ត្រី បានជម្រាបជូនភ្ញៀវអំពីការត្រៀមអនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែន ក្រោមក្របខ័ណ្ឌមហាអនុតំបន់មេគង្គ(GMS-CBTA) ការអនុវត្តការចុះបញ្ជីយានយន្តតាមប្រព័ន្ធអនឡាញ ការផ្ទេរកម្មសិទ្ធិយានយន្ត ការត្រួតពិនិត្យលក្ខណៈបច្ចេកទេសយានយន្ត តាមប្រព័ន្ធអនឡាញដើម្បីសម្រួលដល់ការផ្តល់សេវាសាធារណៈជូនប្រជាពលរដ្ឋ ប្រសិទ្ធភាពនៃការប្រើប្រាស់កម្មវិធីថែទាំផ្លូវដើម្បីរាយការណ៍អំពីផ្លូវខូច និងជង្ហុកសំបុកមាន់ គម្រោងដាក់ឱ្យដំណើរការកម្មវិធី(App) ដកពិន្ទុបណ្ណបើកបរ និងការពិន័យលើបទល្មើសចរាចរណ៍ផ្លូវគោក។
ជាការឆ្លើយតប លោកអគ្គលេខាធិការអាស៊ាន បានថ្លែងនូវកោតសរសើរយ៉ាងជ្រាលជ្រៅចំពោះលោកទេសរដ្ឋមន្ត្រី ដែលសម្រេចបានជោគជ័យសំខាន់ៗលើការអភិវឌ្ឍហេដ្ឋារចនាសម្ព័ន្ធផ្លូវថ្នល់ ក្រោមការចង្អុលបង្ហាញដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានវាយតម្លៃខ្ពស់ចំពោះការរីកចម្រើនបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងគួរកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ហើយសង្ឃឹមថាក្នុងរយៈពេល ១០ឆ្នាំខាងមុខទៀត ទីក្រុងរបស់កម្ពុជានឹងមានការរីកដុះដាលដូចបណ្តាទីក្រុងផ្សេងទៀតនៅបណ្តាតំបន់អាស៊ាន៕
ដោយ ៖ សិលា
