សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់បានទៅស្រែកយំនៅលើស្ពានជ្រោយចង្វា ដោយប្រកាសរកស្វាមីដែលរស់នៅជាមួយគ្នាជាង៣ឆ្នាំ ស្រាប់តែសុខៗចាកចេញទៅបាត់គ្មានដំណឹង ហើយក៏ទាក់ទងតាមទូរស័ព្ទមិនបានទៀត ធ្វើឱ្យរូបគាត់ព្រួយបារម្ភ និងព្យាយាមដើររកប្តីគ្រប់ទីកន្លែងអស់រយៈពេលជិត៣ខែទៅហើយ ទើបដើរមកលើស្ពានជ្រោយចង្វាឈរយំ ដង្ហោយរកប្តី ដែលហេតុការណ៍នេះបង្កឱ្យមានការភ្ញាក់ផ្អើលដល់ប្រជាពលរដ្ឋរាយការណ៍ប្រាប់សមត្ថកិច្ច ព្រោះតែស្មានថាស្ត្រីរូបនេះគិតខ្លីចង់បញ្ចប់ជីវិត កាលពីវេលាម៉ោង៣និង១៥នាទីរំលងអធ្រាត្រឈានចូលថ្ងៃទី៣០ ខែមិថុនា ឆ្នាំ២០២២ នៅលើស្ពានជ្រោយចង្វា ស្ថិតក្នុងសង្កាត់ស្រះចក ខណ្ឌដូនពេញ ។
បើតាមសម្តីស្ត្រីដែលស្វែងរកប្តីរូបនេះបានឱ្យដឹងថា គាត់មានឈ្មោះ អមរា ហៅស្រីពៅ អាយុ២៧ឆ្នាំ ចំណែកប្តីនាងដែលបាត់ខ្លួនមានឈ្មោះ ឆោម ប៊ុណ្ណារ៉ា អាយុ៤០ឆ្នាំ ស្នាក់នៅផ្ទះជួលក្នុងសង្កាត់ផ្សារដើមថ្កូវ ខណ្ឌចំការមន។
ស្រ្តីរូបនេះបន្តថា រូបគាត់និងប្តីបានស្រឡាញ់គ្នាអស់រយៈពេលជាង៣ឆ្នាំទៅហើយ និងបានសែនព្រេនទទួលដឹងឮពីឪពុកម្តាយទាំងសងខាង។ ក្រោយពីចាប់ដៃគ្នាជាប្តីប្រពន្ធមក គាត់បានមកស្នាក់នៅផ្ទះបងថ្លៃរបស់គាត់នៅម្តុំស្តុបណូគា ដោយបានរកស៊ីលក់ដូរហើយក៏មិនមានទំនាស់អ្វីនឹងប្តីដែរ។ ប៉ុន្តែមួយរយៈចុងក្រោយនេះ គាត់និងប្តីបានផ្លាស់ប្ដូរផ្ទះទៅស្នាក់នៅបន្ទប់ជួលនៅម្តុំផ្សារដើមថ្កូវវិញ ទើបប្តីរបស់គាត់បានចាកចេញពីគាត់បាត់សូន្យឈឹង ដោយគ្មានដំណឹងអ្វីទាំងអស់ អស់រយៈពេលជាង៣ខែមកហើយ។ ចំណែកលេខទូរស័ព្ទ ហ្វេសប៊ុក និងប្រព័ន្ធទំនាក់ទំនងផ្សេងៗទៀត ប្តីរបស់គាត់ក៏បានកាត់ផ្ដាច់មិនឱ្យគាត់ទាក់ទងបានទេ ហើយនៅពេលដែលគាត់ទំនាក់ទំនងទៅអ្នកផ្ទះខាងណាក៏គ្មានអ្នកណាប្រាប់ពីដំណឹងប្តីរបស់គាត់ដែរ ដោយពួកគាត់បាននិយាយថា «រឿងប្តីប្រពន្ធដោះស្រាយខ្លួនឯងទៅ»។
រយៈពេលជាង៣ខែមកនេះ គាត់បានដើរសួរដំណឹងប្តីពីអ្នកស្គាល់គ្នា ហើយក៏មានអ្នកខ្លះបានប្រាប់ថា ប្តីរបស់គាត់ត្រូវបានឃាត់ខ្លួនពាក់ព័ន្ធនឹងរឿងប្រើប្រាស់គ្រឿងញៀន។ ប៉ុន្តែគាត់មិនជឿសម្តីគេទេ ដោយគាត់គិតថា ប្តីរបស់គាត់គឺនៅជិតៗគាត់ គ្រាន់តែគេចវេះមិនជួបគាត់តែប៉ុណ្ណោះ ព្រោះជឿសម្តីគ្រួសារចង់ឱ្យគេបែកគ្នាទៅយកអ្នកថ្មី។
ស្រ្តីរូបនេះបន្តទៀតថា គាត់គ្មានបំណងមកលោតទឹកនោះទេ គ្រាន់តែមករំសាយអារម្មណ៍ ព្រោះតែស្មុគស្មាញគំនិត ដេករង់ចាំដំណឹងប្តីតែម្នាក់ឯង។ គាត់សូមប្រកាសឱ្យបុរសជាប្តីមានឈ្មោះ ឆោម ប៊ុណ្ណារ៉ា ចេញមុខមកដោះស្រាយជាមួយគាត់ឱ្យដាច់ស្រឡះ កុំព្យាយាមគេចវេះបែបនេះទៀត ព្រោះគាត់ព្រមលះបង់អស់ហើយសូម្បីតែគ្រួសារ ដើម្បីមករួមរស់ជាមួយប្តី បើចង់ចាកចេញគួរតែមកប្រាប់គាត់មួយម៉ាត់ផង៕
ដោយ៖ជ្រោយពេជ្រ
