សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍គ្រោះថ្នាក់ចរាចរណ៍គួរឲ្យរន្ធត់មួយបានកើតឡើង ដោយសាររថយន្តដឹកជ្រូកបើកលឿនមិនប្រយ័ត្ន ជ្រុលទៅបុករះម៉ូតូពីក្រោយពេញទំហឹងបណ្តាលនិស្សិតពេទ្យស្រីម្នាក់រងរបួសធ្ងន់និងនារីម្នាក់ទៀតរបួសស្រាល ។
ករណីនេះកើតឡើងកាលពីវេលាម៉ោង ៤នឹង៣០នាទីរសៀល ថ្ងៃព្រហស្បតិ៍ ១រោច ខែបឋមាសាឍ ឆ្នាំច សំរិទ្ធស័ក ព.ស២៥៦២ ត្រូវនឹង ថ្ងៃទី២៨ខែមិថុនាឆ្នាំ២០១៨ស្ថិតនៅមុខសាលាបឋមភូមិឬស្សី សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។
អ្នកបើករថយន្តបង្កមានឈ្មោះជួប ធារ៉ា អាយុ២៤មានស្រុកកំណើតនៅភូមិឈូកសរឃុំសឹងស្រុកសំរោង ខេត្តតាកែវ ។ ចំណែកនារីរងគ្រោះទាំងនាក់នោះទី១ ឈ្មោះ ដា ស្រស់ អាយុ២៣ឆ្នាំ រងរបួសស្រាល និងទី២ មិនស្គាល់ឈ្មោះ គ្រាន់តែដឹងថា ជានិស្សិតពេទ្យ រងរបួសធ្ងន់ ។
តាមសាក្សីពីកន្លែងកើតហេតុបានឲ្យដឹងថាមុនពេលកើតហេតុនារីម្នាក់បានជិះម៉ូតូម៉ាកគុបជ្រុងរួមទាំងស្រ្តីម្នាក់ទៀតជិះម៉ូតូម៉ាកសង់សេ១២៥ពណ៌ខ្មៅធ្វើដំណើរស្របទិសគ្នាតាមបណ្តោយផ្លូវមុនី្នរ៉េតទិសដៅពីច្រមុះជ្រូកស្ទឹងមានជ័យឆ្ពោះមកចំការដូងខណៈមកដល់ចំណុចកើតហេតុក៏ត្រូវរថយន្តដឹកជ្រូកមួយគ្រឿងធ្វើដំណើរស្របទិសគ្នាជាមួយម៉ូតូហើយទំនងជាន់ហ្វ្រាំងមិនសុីក៏ជ្រុលបុករះម៉ូតូទាំងពីរគ្រឿងអូសជិត២០ម៉ែត្របណ្តាលឲ្យនារីម្នាក់ជាម្ចាសម៉ូតូគុបជ្រុងរងរបួសមុខនឹងខ្លួនធ្ងន់ហើយស្ត្រីម្ចាស់ម៉ូតូសង់សេ១២៥រងរបួសជើងម្ខាងត្រូវបានដឹកទៅមន្ទីរពេទ្យភ្លាមៗចំណែកតៃកុងរថយន្តបង្កបានចុះពីលើរថយន្តព្យាយាមរត់គេចខ្លួនតែត្រូវបានប្រជាពលរដ្ឋដេញចាប់បានហើយប្រគល់ឲ្យសមត្ថកិច្ចរីឯម៉ូតូទាំងពីរគ្រឿងនឹងរថយន្តបង្កត្រូវបានរងការខូចខាត ។
ក្រោយកើតហេតុសមត្ថកិច្ចជំនាញចរាចរណ៍ខណ្ឌមានជ័យបានសហការជាមួយនគរបាលចរាចរណ៍រាជធានីភ្នំពេញចុះវាស់វែងនៅកន្លែងកើតហេតុហើយបានយកអ្នកបើកបររថយន្តម៉ូតូនឹងរថយន្តទៅរក្សាទុកនៅការិយាល័យចរាចរជើងគោករាជធានីភ្នំពេញរង់ចាំដោះស្រាយគ្នានៅពេលក្រោយ៕ តាឡឹម
