សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ដំរីឈ្មោលមួយក្បាលដែលរងការជាប់ចំណងកាលពីជាង១ខែមុន ពេលនេះបានដួលជាប់ផុងក្នុងល្បាប់សន្លប់នៅវេលាម៉ោង០៩និង៤៥នាទីព្រឹកថ្ងៃសៅរ៍ ៧កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ខែមេសា ឆ្នាំ២០១៨ត្រង់ចំណុចអូរតេភូមិពូតាំង សង្កាត់រម្យនា ក្រុងសែនមនោរម្យ ខេត្តមណ្ឌលគិរី។
ប្រភពពីសមត្ថកិច្ច ក្រុងសែនមនោរម្យបានឲ្យដឹងថា ជាដំរីខាងលើដែលវាបានដេកដួលក្រោកមិនរួចនោះ ព្រោះតែកង្វះចំណីអាហារក្រោយពេលពីម្ចាស់វាមានការធ្វេសប្រហែស។
សមត្ថកិច្ចបន្តថា ជាដំរីឈ្មោះបឹក គុក អាយុ៣៥ឆ្នាំបានរងនូវការបាញ់ថ្នាំសន្លប់ម្តងរួចមកហើយពីសំណាក់អង្គការវាយ អេត។
ទោះជាយ៉ាងណាម្ចាស់ឈ្មោះចុច ចេល ជនជាតិដើមព្នង ក្រោយពីដំរីមានសភាពបែបនេះ ក៏បានរាយការណ៍ទៅសមត្ថកិច្ចឲ្យចុះពិនិត្យផងដែរ។
ប្រធានអង្គការវាយ អេត ដែលមានភារកិច្ចលើសត្វដំរីនេះមិនអាចទំនាក់ទំនងបានទេ។
នៅរសៀលថ្ងៃដដែលនេះ លោក ឃុន ឌីយ៉ូន ប្រធានអង្គការកាពារសត្វដំរីថាដំរីឈ្មោលមួយក្បាលនោះ មានសភាពធ្ងន់ធ្ងរណាស់ទៅហើយប្រហែលជាគ្មានសង្ឃឹមរស់តទៅទៀតនោះទេ។
ដំរីឈ្មោលឈ្មោះបឹក គុកនេះត្រូវបានមន្ត្រីអង្គការវាយអេតបាញ់ថ្នាំឲ្យសន្លប់ដើម្បីបន្សាបការបំរ៉ុងនិងចុះប្រេងកាលពីថ្ងៃទី២៨ខែមីនា២០១៨កន្លងទៅ ។
ព្រោះនៅថ្ងៃទី២៦មិនាមានសភាពមិនប្រក្រតីដំរីខាងលើបានរើបំរះផ្តាច់ចំណងនិងបានចូលទៅសំងំនៅក្នុងព្រៃចំណុចអូរតេរយៈពេល២ថ្ងៃនិងត្រូវចាប់បានមកចងវិញ។
ការបន្សាបភាពកាចសាហាវរបស់វាមិនដឹងថា កំឡុងវាជាប់ចំណងនោះត្រូវទទួលការមើលថែពីម្ចាស់ឬពីអង្គការវាយអេតដែរនោះទេ៕ ជីវន្ត
