សមត្ថកិច្ចនគរបាលខណ្ឌជ្រោយចង្វាឃាត់ខ្លួនជនសង្ស័យ៤នាក់ ដកហូតថ្នាំញៀន៣កញ្ចប់ និងម៉ូតូ២គ្រឿង

ភ្នំពេញ៖ សមត្ថកិច្ចនគរបាលខណ្ឌជ្រោយចង្វា សហការជាមួយនគរបាលប៉ុស្ដិ៍ជ្រោយចង្វា ឃាត់ខ្លួនជនសង្ស័យ៤នាក់ ដកហូតថ្នាំញៀន៣កញ្ចប់ និងម៉ូតូ២គ្រឿង កាលពីម៉ោង៩និង៣០នាទីយប់ ថ្ងៃទី១២ ខែតុលា ឆ្នាំ២០១៦ នៅតាមផ្លូវលំ ភូមិ១ ស្ថិតនៅក្នុងសង្កាត់-ខណ្ឌជ្រោយចង្វា ។

សមត្ថកិច្ចនគរបាលខណ្ឌជ្រោយចង្វាបានឲ្យដឹងថា ជនសង្ស័យឃាត់ខ្លួនខាងលើទី១-ឈ្មោះម៉ៅ សុម៉ី អាយុ១៦ឆ្នាំ មុខរ បរជាសិស្ស និងទី២-ឈ្មោះយន់ ស៉ីណាត អាយុ ១៦ឆ្នាំ មុខរបរនៅផ្ទះ ជនសង្ស័យទាំង២នាក់ស្នាក់នៅតាម បណ្ដោយផ្លូវម៉ាស៉ីនទឹក ស្ថិតក្នុងភូមិ៣ សង្កាត់-ខណ្ឌជ្រោយចង្វា ទី៣-ឈ្មោះថា ស៉ីថុន អាយុ២ ២ឆ្នាំ មុខរបរកម្មករ និងទី៤-ឈ្មោះរឿង ចាន់ណា អាយុ១៧ឆ្នាំ មុខរបរមិនពិតប្រាកដ ជនសង្ស័យទាំង២នាក់ ស្នាក់នៅភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្ដាល ។

សមត្ថកិច្ចនគរបាលខណ្ឌជ្រោយចង្វាបានឲ្យដឹងថា កម្លាំងនគរបាលខណ្ឌ និងកម្លាំងនគរបាលប៉ុស្ដិ៍តាមមូលដ្ឋានបានចេញយាមល្បាតតាមគោលដៅនីមួយៗតាមដងផ្លូវសាធារណៈដើម្បីត្រួតពិនិត្យលើមធ្យោបាយផ្សេងៗ ដែលគួរសង្ស័យទើបឈានដល់ការបង្ក្រាបជាក់ស្ដែងនូវករណីរក្សាទុកនិងប្រើប្រាស់គ្រឿងញៀនលើសមសភាពបក្ខពួកសង្ស័យទាំង៤នាក់បើកម៉ូតូ២គ្រឿងឆ្លងកាត់ក៏ឃាត់ឆែកឆេរដកហូតបានក្រាមសថ្លាជាថ្នាំញៀន៣កញ្ចប់តូច និងដកហូតម៉ូតូ២គ្រឿងម៉ាក MSX ពណ៌ក្រហម ពាក់ស្លាកលេខ ភ្នំពេញ ១CT-៧៥៧៧ និងមួយគ្រឿងទៀតម៉ាកហុងដាសេ១២៥ ពណ៍ខ្មៅ សេរីឆ្នាំ២០១៥ ពាក់ស្លាកលេខ ភ្នំពេញ ១DE-៦៥៦៩ ដែលក្រុមនេះជិះធ្វើសកម្មភាពផងដែរ ។

បច្ចុប្បន្នជនសង្ស័យទាំង៤នាក់ រួមជាមួយវត្ថុតាង កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ជូនទៅសាលាដំដូងរាជធានីភ្នំពេញ ចាត់ការបន្តតាមនិតិវិធី ៕ ជ្រោយពេជ្រ