សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ៣នាក់ និងថ្នាំញៀន១កញ្ចប់តូច ត្រូវកម្លាំងសមត្ថកិច្ចប៉ុស្តិ៍ទឹកថ្លា ឃាត់ខ្លួន ខណៈឆែកឆេរកឃើញនៅលើខ្លួនរបស់ពួកគេ មានដែកកែឆ្នៃកាលពីវេលាម៉ោង០១និង៣០នាទី រំលងអធ្រាត្រ ឈានចូលថ្ងៃទី៣ ខែវិច្ចិកា ឆ្នាំ២០១៦ តាមបណ្ដោយផ្លូវ២០០៤ ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពពីសមត្ថកិច្ចខាងលើបានប្រាប់អោយដឹងថា មុនពេលឃាត់ខ្លួន ខណះកម្លាំងចម្រុះរាជធានីបានល្បាតក្នុងមូលដ្ឋាន ដើម្បីកាត់បន្ថយបទល្មើសក្នុងមូលដ្ឋាន ដែលកើតឡើងដោយប្រការណាមួយ ហើយពេលដែលជិះម៉ូតូល្បាតតាមបណ្ដោយផ្លូវ២០០៤ ក៏ប្រទះឃើញបុរសបីនាក់ ជិះម៉ូតូមួយគ្រឿង ម៉ាក MSX ពណ៌ខ្មៅ ពាក់ស្លាកលេខ ក្លែងក្លាយ ភ្នំពេញ ១FJ ០២៥៦ ហើយឃើញអ្នកទាំងបីជិះម៉ូតូក្នុងលក្ខណៈសង្ស័យ ហើយឃាត់ដើម្បីឆែកឆេរ ពេលនោះស្រាប់តែប្រទះឃើញកញ្ចប់ថ្នាំញៀនមួយកញ្ចប់ និងដែកឆ្កិះសោចំនួនមួយនៅលើខ្លួនជនម្នាក់ក្នុងចំណោមបីនាក់ ។
ក្រោយមក កម្លាំងសមត្ថកិច្ច ក៏បានឃាត់ជនសង្ស័យខាងលើហើយភ្លាមៗនោះកម្លាំងខាងលើ បាននាំខ្លួនបុរសទាំងបីនាក់នៅយកទៅសាកសួរនៅប៉ុស្ដិ៍នគរបាលរដ្ឋាបាលទឹកថ្លា ។
បើតាមមន្ត្រីដែលប្រចាំការនៅប៉ុស្ដិ៍បានអោយដឹងថា យុវជនទាំងបីនាក់ខាងលើ មានឈ្មោះ ១ លី ដារ៉ូ ហៅ ពងទា ភេទប្រុស អាយុ២៦ឆ្នាំ មុខរបរមិនពិតប្រាកដ ស្នាក់នៅ៦ជាន់ សង្កាត់ចោមចៅ ខណ្ឌពោធិ៍សែនជ័យ ទី២ ឈ្មោះ ចន សុង ភេទប្រុស អាយុ១៨ឆ្នាំ មុខរបរជាងជួសជុលពិដាន ស្នាក់នៅក្រាំងធំ ស្រុកបាទី ខេត្តតាកែវ ទី៣ ឈ្មោះ ចាន់ សុភក្រ្ដ័ អាយុ ២៩ឆ្នាំ មុខរបរមិនពិតប្រាកដ ស្នាក់នៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ។
ប្បច្ចុប្បន្នអ្នកទាំងបីកំពុងបញ្ជូនបន្តទៅអធិការដ្ឋានខណ្ឌសែនសុខ រង់ចាំការចាត់ការតាមនីតិវិធី ៕ តុង សីហា
