សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យ៉ាងហោចណាស់ក៏មានមនុស្សចំនួន២នាក់បានស្លាប់យ៉ាងអាណោចអាធ័ម និង៥នាក់ទៀតបានរងរបួសធ្ងន់ធ្ងរបន្ទាប់ពីពួកគេជិះម៉ូតូ២គ្រឿងបុកគ្នាពេញទំហឹង។
ហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអធ្រាត្រ ឈានចូលថ្ងៃទី៦ ខែធ្នូ ឆ្នាំ២០១៦ នៅចំណុចមុខបុរីសែនមនោរម្យ តាមបណ្តោយផ្លូវជាតិលេខ៤ សង្កាត់ចោមចៅ ខណ្ឌពោធិ៍សែនជ័យ ។
អ្នកដែលស្លាប់ និងរបួសនៅមិនទាន់ស្គាល់អត្តសញ្ញាណនៅឡើយទេ ។
តាមសាក្សីនៅកន្លែងហេតុបានអោយដឹងថា នៅមុនពេលកើតហេតុគេសង្កេតឃើញម៉ូតូម៉ាកស្មាស់រ៉េវូ ពណ៍ខ្មៅ ពាក់ស្លាកលេខភ្នំពេញ1BV 2933 បើកបរដោយបុរសម្នាក់និងឌុបគ្នា៣នាក់ទៀតនៅពីក្រោយ ធ្វើដំណើរតាមបណ្តោយផ្លូវជាតិលេខ៤ក្នុងទិសដៅពីកើតទៅលិចក្នុងល្បឿនលឿនខណះមកដល់ចំណុចកើតហេតុក៏មានម៉ូតូមួយគ្រឿងទៀតម៉ាកឌ្រឹមសង់ ពណ៍ខ្មៅស៊េរីឆ្នាំ២០១៤ ពាក់ស្លាកលេខភ្នំពេញ1CN 5054 ជិះគ្នា៣នាក់ធ្វើដំណើរបញ្ច្រាសទិសគ្នាក្នុងល្បឿនលឿនដូចគ្នាហើយបានបុកចំពីមុខពេញទំហឹងបណ្តាលអោយអ្នកជិះម៉ូូតូឌ្រឹមសង់ស្លាប់២នាក់របួសម្នាក់ដែលនៅខាងក្រោយគេ ដោយឡែកអ្នកជិះម៉ូតូស្មាស់រ៉េវូរងរបួសធ្ងន់ទាំង៤នាក់តែម្តង ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅមុន្ទីរពេទ្យភ្លាមៗចំណែកសព ជនរងគ្រោះត្រូវបានសមត្ថកិច្ចដឹកយកទៅតម្កល់ទុកនៅវត្តតាំងក្រសាំងរង់ចាំស្រាវជ្រាវរកក្រុមគ្រួសារដោយឡែកម៉ូតូទាំង២គ្រឿងសមត្ថកិច្ចមូលដ្ឋានបានសហការជាមួយនគរបាលចរាចរណ៍ជើងគោករាជធានីភ្នំពេញវាស់វែងយកទៅរក្សាទុករងចាំដោះស្រាយពេលក្រោយ ៕ សុខាសែនជ័យ
