សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកNAVARA មួយគ្រឿង បានបើកចុះពីលើស្ពានអាកាសស្ទឹងមានជ័យក្នុងល្បឿនលឿន ខណៈដល់ផ្លូវកោងបានគេចពីរថយន្តមួយគ្រឿងទៀត ជ្រុលបុកទៅឃឿននិងជញ្ជាំងក្រោមស្ពានបណ្ដាលឲ្យរងការខូចខាត ។
ហេតុការណ៍គ្រោះថ្នាក់ចរាចរណ៍ខាងលើបានបង្កឡើងនៅវេលាម៉ោង៣និង៣០នាទីរំលងអធ្រាត្រ ឈានចូលថ្ងៃទី១៥ ខែធ្នូ ឆ្នាំ២០១៦ នៅចំណុចក្រោមស្ពានអាកាសស្ទឹងមានជ័យ តាមបណ្ដោយផ្លូវ២៧១ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
យោងតាមប្រភពព័ត៌មានពីប្រជាពលរដ្ឋ ដែលឃើញហេតុការណ៍ខាងលើបានប្រាប់ឲ្យដឹងថា នៅមុនពេលកើតហេតុ គឺរថយន្តបង្កម៉ាក NAVARA ពណ៌ស្ក ពាក់ស្លាកលេខភ្នំពេញ 2V.0159 បើកបរដោយបុរសម្នាក់និងរួមដំណើបុរស២នាក់ទៀតក្នុងរថយន្ត តាមបណ្ដោយផ្លូវ២៧១ ទិសដៅពីត្បូងមកជើង ដោយឡើងលើស្ពានអាកាសស្ទឹងមានជ័យ ក្នុងល្បឿនលឿន ខណះដល់គល់ស្ពានដែលជាផ្លូវកោង ហើយបានគេចពីរថយន្តម៉ាកហាយឡែនឌ័រ ក៏ជ្រុលចង្កូតទៅជ្រុលបុកទៅឃឿនក្រោមស្ពាន ហើយហោះទៅបុកជញ្ចាំងក្រោមស្ពានបន្ថែមទៀត បណ្ដាលឲ្យរថយន្តបង្កខ្ទៀតទៅលើពាក់កណ្ដាលផ្លូវ រងការខូចខាតយ៉ាងដំណំ ។
ក្នុងហេតុការណ៍គ្រោះថ្នាក់ចរាចរណ៍ខាងលើ គេសង្កែតឃើញពុំមានមនុស្សណាម្នាក់រងរបួសធ្ងន់ធ្ងរឡើយ ហើយក្រោយពេលកើតហេតុភ្លាមៗ បុរសទាំង៣នាក់ក្នុងរថយន្តបានចុះហៅម៉ូតូកង់បីគេចទៅបាត់ ។
ក្រោយពេលកើតហេតុសមត្ថកិច្ចមញលដ្ឋានបានចុះមកវាស់វែង យករថយន្តបង្កទៅរក្សាទុកនៅអធិការនគរបាលខណ្ឌមានជ័យ ដើម្បីរង់ចាំចូលខ្លួនដោះស្រាយតាមនីតិវិធី៕ ភារ៉ា ដង្កោ
