សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ៖ ជនសង្ស័យជាចោរកាច់សោ ក ម៉ូតូម្នាក់ត្រូវបានសមត្ថកិច្ចចម្រុះក្នុងមូលដ្ឋានស្ទាក់ចាប់ខ្លួនភ្លាមៗ បន្ទាប់ពីជនសង្ស័យរូបនេះ ធ្វើសកម្មភាពលួចកាច់សោ ក ម៉ូតូគេបានហើយព្យាយាមជិះគេចខ្លួន តែរត់មិនរួច។
ហេតុការណ៍បាត់ម៉ូតូ និងចាប់បានជនសង្ស័យនេះ កើតឡើងនៅម៉ោងប្រហែល ២និង៣០នាទីរសៀល ថ្ងៃទី២៤ ខែកុម្ភៈ ឆ្នាំ២០១៧ នៅភូមិស្ទឹងជើង ឃុំពពេល ស្រុកពញាក្រែក ខេត្តត្បូងឃ្មុំ ។
អធិការស្រុកពញាក្រែក លោក អោម មុន្នីវណ្ណ បានឲ្យដឹងថា មានករណីចោរកម្ម លួចកាច់សោយកម៉ូតូ១គ្រឿង នៅភូមិស្ទឹងជើង ឃុំ ពពេល ស្រុកពញាក្រែក របស់ឈ្មោះ ហេង ចាន់ណា ភេទ ប្រុស អាយុ៣៧ឆ្នាំ រស់នៅ ភូមិស្ទឹងជើង ឃុំ ពពេល ស្រុកពញាក្រែក ។
លោកបន្តថា ក្នុងករណីខាងលើកនេះ ដោយមានការសហការ ពីកម្លាំងប្រជាការពារ និង នគរបាល-កម្លាំងកងរាជអាវុធហត្ថ កំពុងឈរជើង ទប់ស្កាត់នៅ ចំណុចផ្សារស្ទឹង ចេញមកតាមស្ទាក់ និង ឃាត់ខ្លួនបានជនសង្ស័យបាន១នាក់ ទៅកាន់ប៉ុស្តិ៍រដ្ឋបាលកោងកាង ដើម្បីសួរនាំ។
លោកក៏បានបញ្ជាក់ទៀតថា ផ្អែកតាមការសារភាព របស់ជនសង្ស័យ ឈ្មោះ ឆាន់ ចិត្ត ភេទ ប្រុស អាយុ២៧ឆ្នាំ រស់នៅភូមិរំសាយសក់ ឃុំ ស្នូល ស្រុក ស្នូល ខេត្តក្រចេះ ថា ខ្លួនពិតជាបាន ធ្វើសកម្មភាព លួចកាច់សោ យកម៉ូតូ១គ្រឿង ម៉ាកណេវ ពណ៌ស សេរី ២០០១ គ្មានស្លាក របស់ឈ្មោះ ហេង ចាន់ណា នៅភូមិស្ទឹងជើង ឃុំពពេលពិតមែន ។
ករណីខាងលើនេះ ជំនាញ នៃ អធិការដ្ឋានស្រុក កំពុងចាត់ការបន្តតាមនីតិវិធី រីឯម៉ូតូបានប្រគល់ជូនម្ចាស់ដើមវិញ៕ វណ្ណះ
