សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: កម្លាំងនគរបាលប៉ុស្តិ៍ស្ទឹងមានជ័យ បានឃាត់ខ្លួនមុខសញ្ញាគាស់ផ្ទះ និងប្រើប្រាស់គ្រឿងញៀនម្នាក់ កាលពីម៉ោង៣ និង២០នាទីឈានចូល ថ្ងៃទី៦ ខែឧសភា ឆ្នាំ២០១៧ ស្ថិតនៅចំណុចផ្លូវបេតុងសឡា ភូមិទ្រា១ សង្កាត់ស្ទឹងមានជ័យ ខណ្ឌមានជ័យ ។
មន្រី្តនគរបាលប៉ុស្តិ៍ស្ទឹងមានជ័យបានឲ្យដឹងថា ជនសង្ស័យរូបនេះមានឈ្មោះ សាន រ៉ាវុធ ភេទប្រុស អាយុ៣៨ឆ្នាំ មុខរបរជាងសំណង់ មានស្រុកកំណើតនៅភូមិ ឃុំ អាចារ្យលក្ខ ស្រុកស្ទឹងសែន ខេត្តកំពង់ធំ បច្ចុប្បន្ន ស្នាក់នៅផ្ទះជួលភូមិថ្មី សង្កាត់ស្ទឹងមានជ័យ ខណ្ឌមានជ័យ។ មុននឹងឈានដល់ការចាប់ខ្លួនបានជនសង្ស័យខាងលើនេះ គឺកម្លាំងនគរបាលប៉ុស្តិ៍ស្ទឹងមានជ័យ បានដឹកនាំកម្លាំងចុះល្បាតក្នុងភូមិសាស្រ្តរបស់ខ្លួន កស្រាប់តែប្រទះឃើញជនសង្ស័យខាងលើកំពុងដើរតាមផ្លូវហើយ ដោយមានការសង្ស័យ ក៏បានឃាត់ឲ្យឈប់ដើម្បីត្រួតពិនិត្យស្រាប់តែជនសង្ស័យភ័យព្យាយាមរត់គេចខ្លួន តែត្រូវកម្លាំងសមត្ថកិច្ចដេញតាមឃាត់ខ្លួនបានភ្លាមៗ និងឆែកឆេររកឃើញដែកប្រដាប់កាច់សោកម៉ូតូចំនួន១ និងម្សៅក្រាម ពណ៌សថ្លា សង្ស័យជាសារធាតុញៀន១កញ្ចប់ថង់តូចផងដែរ។
ជនសង្ស័យបានសារភាពថា មុនពេលឃាត់ខ្លួនរូបគេចេញពីផ្ទះក្នុងគោលបំណង ដើររកលួចទ្រព្យសម្បត្តិប្រជាពលរដ្ឋតាមផ្ទះតែមិនទាន់បានលួចផងត្រូវសមត្ថកិច្ចហៅត្រួតពិនិត្យឃើញមានដែកកាច់សោកម៉ូតូនៅជាប់នឹងខ្លួន ហើយនិងថ្នាំញៀន១មួយកញ្ចប់ថង់តូច ដែលខ្លួនបានទិញពីមុខពេទ្យព្រះកុសុមៈទុកសម្រាប់យកមកប្រើ កុំឲ្យងងុយដេកដើម្បីធ្វើសកម្មភាពដើរលួចពេលយប់។
បច្ចុប្បន្នជនសង្ស័យរូបនេះត្រូវបាននគរបាលប៉ុស្តិ៍ស្ទឹងមានជ័យកសាងសំណុំរឿងនិងបញ្ជូនខ្លួនទៅអធិការដ្ឋាននគរបាលខណ្ឌមានជយ័ដើម្បីចាត់ការតាមនីតិវិធី៕ ប្រាថ្នា
