សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ មានសេចក្តីរាយការណ៍មកថា៖ ឈ្មោះ ស៊ាន ស៊ន អតីត ជាប្រធានសហគមន៍ការពារព្រៃឡង់ នៅស្រុកសណ្ដាន់ ខេត្តកំពង់ធំ បន្ទាប់ពីក្រសួងបរិស្ថានប្រកាសជ្រើសរើសបុគ្គលិក លោក ស៊ាន ស៊ន ត្រូវបាន អង្គភាពតែងតាំជាប្រធាន ស្នាក់ការបរិស្ថាន ការពារព្រៃឡង់អូរងាវ ស្ថិតនៅក្នុងឃុំដងកាំបិត ស្រុកសណ្តាន់ ខេត្តកំពង់ធំ ថ្មីៗនេះ បែរជា លោក ស៊ាន ស៑ន ត្រូវបានរងការរិះគន់ពីប្រជាពលរដ្ឋថា បានទៅចាប់ អ្នកកាន់ម៉ាសុីនកាត់ឈើ ឈ្មោះ ទីន ឡន ជំរិតយកប្រាក់ចំនួនបួនលានរៀល តែសំរួលនៅត្រឹម បីលាន កន្លះ ជាថ្នូរនឹងការដោះលែងវិញ។
ជាក់ស្តែងក្នុងថ្ងៃទី៩ ខែសីហា ឆ្នាំ២០១៧ លោកប្រធានស្នាក់ការបរិស្ថាន មុខលុយម្នាក់នេះបានទៅចាប់ឡាន ម៉ាកហ៊ីយិនដាយ ពីរតោនកន្លះ ក្បាលសមួយគ្រឿង របស់យាយ ហ៊ីម នៅតាំងគោគ ស្រុកបារាយណ៍ ខេត្តកំពង់ធំ ជំរិតយកប្រាក់ពីម្ចាស់ឡានដឹកឈើចំនួនមួយលានរៀលជាថ្នូរនិងការដោះលែងវិញ។ ពួកគាត់បន្តថា យុទ្ធនាការបង្ក្រាបនេះ គឺចាប់បានរថយន្តដឹកឈើ និងមនុស្សជំរិតយកលុយ មិនមែនកាពារព្រៃឡង់នោះទេ។
គេបានសំណូមពរថា ដើម្បីឲ្យយន្តការរបស់រាជរដ្ឋាភិបាលក្នុងការទប់ស្កាត់ និងបង្ក្រាបបទល្មើសព្រៃឈើមានប្រសិទ្ធភាព គឺទាមទារឲ្យស្ថាប័នពាក់ព័ន្ធត្រូវស៊ើបអង្កេតរកអ្នកនៅពីក្រោយខ្នងឲ្យបានច្បាស់លាស់។ បន្ថែមពីនេះ ត្រូវដាក់ទោសទណ្ឌជនទាំងនោះដោយគ្មានការលើកលែង។
លោក ស៊ាន ស៑ន បានប្រាប់ក្នុងកិច្ចសម្ភាសថា លោកសុំបដិសេដចំពោះការចោទប្រកាន់រឿងការយកលុយកាក់ទាំងនេះ តែ យាយ ហ៊ីមម្នាស់រថយន្ដដឹកឈើប្រាប់ថា គាត់បានបង់លុយអោយមន្រ្ដីបរិស្ថាន 1លានរៀលជាថ្នូរនៃការដោះលែងរថយន្ដរបស់គាត់៕ ប៊ុន រិទ្ធី
