សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នគរបាលនាយកដ្ឋានកណ្ដាលសន្តិសុខក្រសួងមហាផ្ទៃ នៅថ្ងៃទី១៦ ខែសីហា នេះ បញ្ជូនបុរសជនជាតិសេរ៉ាឡេអូនម្នាក់និងបុរសជនជាតិលីប៊ីម្នាក់ មកអយ្យការអមសាលាដំបូងរាជធានីភ្នំពេញ ដើម្បីសាកសួរករណីយកក្រដាសកែច្នៃលាងឲ្យទៅជាប្រាក់ដុល្លារអាមេរិក ពិតប្រាកដ ។ ប៉ុន្តែរហូតមកទល់ពេលនេះ លោក រៀល សុភិន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ពុំទាន់សម្រេចយ៉ាងណានៅឡើយទេ ពោលគឺកំពុងសាកសួរនៅឡើយ ។
នគរបាលបញ្ជាក់ថា បុរសជនជាតិសេរ៉ាឡេអូនឈ្មោះ កាម៉ារ៉ា អាប់ឌុល អាយុ៣៧ឆ្នាំ និងបុរសជនជាតិលីប៊ី ឈ្មោះ ដាវិដសុន អាល់ប៉ុនសុន អាយុ៤៨ឆ្នាំ បានត្រូវនគរបាលនាយកដ្ឋានកណ្តាលសន្តិសុខក្រសួងមហាផ្ទៃ ឃាត់ខ្លួនកាលពីថ្ងៃទី១៤ ខែសីហា នៅក្នុងរាជធានីភ្នំពេញ ។
ចំពោះមូលហេតុនៃការឃាត់ខ្លួននេះ សមត្ថកិច្ចពុំបានបញ្ជាក់អោយដឹងលម្អិតទេ តែប្រភពព័ត៌មានផ្សេងមួយទៀតបានបង្ហើបឲ្យដឹងថា បុរសជនជាតិបរទេសទាំងពីរនាក់នេះបានចូលមក ប្រទេសកម្ពុជាដោយបាននាំយកម៉ាស៊ីនសម្រាប់លាងក្រដាសដែលគេនាំចូលមក ដើម្បីចេញជាប្រាក់ដុល្លារអាមេរិក។
សកម្មភាពនេះពួកគេបានធ្វើមួយរយៈរួចមកហើយ គ្រាន់តែពុំទាន់បានយកក្រដាសប្រាក់ដែលលាងរួចនោះ យកទៅចាយវាយនៅឡើយទេ តែសមត្ថកិច្ចបើកការស្រាវជ្រាវជាបន្តបន្ទាប់ ទើបឈានដល់ការឃាត់ខ្លួនតែម្តង។
ក្រោយពេលឃាត់ខ្លួនរួចហើយ សមត្ថកិច្ចបានឆែកឆេររកន្លែងស្នាក់នៅបុរសជនជាតិបរទេសទាំងពីរនាក់នេះ ហើយរកឃើញប្រាក់លាងរួចហើយចំនួន២លានដុល្លារអាមេរិក៕ចេស្តា
