ខ្ទេចទាំងរថយន្តនិងរបាំងថ្ម ព្រោះតែបុរសម្នាក់ស្រវឹងស្រាបេីកបុក

ភ្នំពេញ៖ បុរសម្នាក់បានចេញពីផឹកសុីស្រវឹងហើយបើករថយន្តហាយឡែនឌ័រមួយគ្រឿង ជ្រុលទៅបុករបាំងថ្មពុះចែកទ្រូងផ្លូវយ៉ាងពេញទំហឹង បណ្ដាលឲ្យបាក់អស់២កង់បាក់រាបដល់ដី ។​

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១១ និង២០នាទីយប់ ថ្ងៃទី១៥ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវម៉ៅសេងទុង កែងនឹងផ្លូវ១៩៣ ក្នុងសង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់បើករថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខភ្នំពេញ2AL_8452 ដោយបើកបរក្នុងស្ថានភាពស្រវឹង ធ្វើដំណើតាមបណ្ដោយផ្លូវ១៩៣ ទិសដៅពីកើតមកលិច ក្នុងល្បឿនលឿន លុះមកដល់ចំណុចកើតហេតុ ក៏បានបួងចង្កូតបត់ស្ដាំ តែបត់មិនទាន់ ក៏រេចង្កូតទៅបុករបាំងថ្មពុះចែកទ្រូងផ្លូវយ៉ាងពេញទំហឹង បណ្តាលឲ្យទ្រូងផ្លូវចំនួន២កង់បាក់រងការខូចខាតយ៉ាងដំណំ ចំណែករថយន្តបង្កក៏បានរងការខូចខាតខ្ទេចមួយកំណាត់មុខទាំងស្រុងទៅមុខលែងរួចផងដែរ តែអ្នកបើកបររងរបួសស្រាលប៉ុណ្ណោះ ។

អ្នកបើករថយន្តបង្កហេតុខាងលើមានឈ្មោះ ហែន ផានិត ភេទប្រុស អាយុ២៧ឆ្នាំ មានស្រុកកំណើតនៅភូមិបាវិតលើ ឃុំបាវិត ក្រុងបាវិត ខេត្តស្វាយរៀង ។

ក្រោយមក សមត្ថកិច្ចជំនាញចរាចរណ៍ក្រុង បានចុះមកវាស់វែង ស្ទួចយករថយន្តបង្កខាងលើ យកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយគ្នាតាមផ្លូវច្បាប់ ៕ ភារ៉ា ដង្កោ